12 სექტემბერს ახალქალაქში ქალაქის 962 წლის იუბილისადმი მიძღვნილი დიდი სადღესასწაულო დღე გაიმართება. ადგილობრივ მცხოვრებლებსა და სტუმრებს ქალაქის ცენტრალურ პარკში „ახალქალაქი-2026“-ის ერთად აღსანიშნავად ეპატიჟებიან.
სადღესასწაულო ღონისძიებები 15:00 საათზე დაიწყება. ორგანიზატორებმა ყველა ასაკის სტუმრისთვის მდიდარი პროგრამა მოამზადეს – მასტერკლასებითა და სპორტული შეჯიბრებებით დაწყებული, კონცერტებით, საბავშვო გასართობებითა და ფოიერვერკით დამთავრებული. 15:00 საათიდან ცენტრალურ პარკში სხვადასხვა თემატური სივრცე ამოქმედდება:
ადგილობრივი კერძების მომზადების მასტერკლასები და დეგუსტაცია – სტუმრებს საშუალება ექნებათ გაეცნონ ტრადიციულ სამზარეულოს და დააგემოვნონ ადგილობრივი ნუსხა;
ეთნოგრაფიული კუთხე – ადგილობრივი ტრადიციებისა და კულტურის უკეთ გაცნობის შესაძლებლობა;
სპორტული შეჯიბრებები ბავშვებისა და უფროსებისთვის;
ორკესტრისა და „ოჩოფეხების“ კოსტიუმირებული პერსონაჟების მსვლელობა;
საბავშვო ზონა, სადაც 15:30 საათზე თოჯინების სპექტაკლი გაიმართება და ასევე იმუშავებს ბატუტები.
15:00-დან 19:00 საათამდე ვიზიტორებს სხვადასხვა გასართობი აქტივობა ელოდებათ: მხიარული სტარტები, ტირი, სუვენირების მაღაზია, არტ-ზონა, ცეკვის თამაშები (Just Dance), ილუზიონისტის გამოსვლა და აკვაგრიმი.
16:00-დან 17:00 საათამდე სადღესასწაულო მოედნის ტერიტორიაზე კვლავ გაიმართება ორკესტრისა და კოსტიუმირებული პერსონაჟების მსვლელობა.
17:00-დან 18:30 საათამდე ადგილობრივი ანსამბლების კონცერტი ჩატარდება, რომელიც მაყურებელს ცეკვის ხელოვნებას წარუდგენს.
18:30 საათზე სტუმრებს შთამბეჭდავი ცეცხლოვანი შოუ ელოდებათ.
საღამოს მუსიკალურ ნაწილს 19:00-დან 20:30 საათამდე ჯგუფი „ქიმერა“ და მომღერალი ანჟელიკა რამაზიანი გააგრძელებენ. სადღესასწაულო დღე საზეიმო ფოიერვერკით დასრულდება. ორგანიზატორები ახალქალაქის მცხოვრებლებსა და ქალაქის სტუმრებს იწვევენ, შეუერთდნენ ზეიმს და ერთად აღნიშნონ ახალქალაქის 962 წლის იუბილე -დღე, რომელიც ქალაქის ისტორიას, კულტურას, ტრადიციებსა და თანამედროვე განვითარებას ეძღვნება.
შეგახსენებთ, რომ სადღესასწაულო ღონისძიებების ჩასატარებლად სახსრები ახალქალაქის მუნიციპალიტეტის ბიუჯეტში იყო გათვალისწინებული. 30 ივლისს ახალქალაქის მერიამ სადღესასწაულო ღონისძიებების ორგანიზებაზე ტენდერი გამოაცხადა. ტენდერის საწყისი ღირებულება 85 000 ლარს შეადგენდა. ტენდერში გამარჯვებული თბილისელი ინდივიდუალური მეწარმე გიორგი ტაბატაძე გახდა, რომელმაც სამუშაოების შესრულება 67 650 ლარად შესთავაზა.
