საერთაშორისო ავტომაგისტრალ ახალქალაქი–კარწახის გასწვრივ მდებარე სოფლების დაახლოებით 80-მა მცხოვრებმა დღეს, 22 ივლისს, 15:00 საათის შემდეგ სოფელ ვაჩიანთან მოიყარა თავი გზის გადაკეტვის განზრახვით, რადგან გზის გაუვალი მდგომარეობის გაძლება აღარ შეუძლიათ. თუმცა, საბოლოოდ გზა მაინც არ ჩაკეტილა. გარშემო მდებარე სოფლების მცხოვრებთა კითხვებს ახალქალაქის მერმა, მელქონ მაკარიანმა უპასუხა, რომელიც პროტესტის ადგილზე მივიდა.
ახალქალაქის მერი ადგილზე მოსახლეობის შეკრებიდან 40 წუთში მივიდა. ის მიუახლოვდა მომიტინგეებს და ვითარების განმარტება დაიწყო. მისი თქმით, ხელისუფლებამ იცის ამ პრობლემის შესახებ, თუმცა ამ მომენტისთვის არაფრის გაკეთება არ შეუძლიათ, რადგან კომპანიები, რომლებსაც ახალქალაქი–კარწახის გზის რეაბილიტაცია უნდა განეხორციელებინათ, უხარისხოდ შესრულებული სამუშაოების გამო ჩამოაშორეს პროცესს.
„გაზაფხულზე გამოცხადდა ტენდერი, გაიმარჯვა სამმა კომპანიამ. ამჟამად სამივე კომპანიას ჩამორთმეული აქვს სამუშაოები, რადგან მათ მიერ ჩატარებული სამუშაოები უხარისხო იყო. ეს იყო წუნი. შესაბამისი ორგანოები სწავლობენ იმ პირების საქმეს, ვინც სახელმწიფო მოატყუა. ახლა გამოცხადებულია ახალი ტენდერი, ფორმდება კონტრაქტი. მე არ მინდა თქვენი მოტყუება და ფუჭი იმედების მოცემა. წელს გზის შეკეთებას ქალაქიდან დაიწყებენ და იმდენს გააკეთებენ, რამდენსაც მოასწრებენ. რა შედეგი იქნება და როდის დასრულდება სამუშაოები, ვერ გეტყვით და არ მოგატყუებთ. სამუშაოები უახლოეს მომავალში დაიწყება“, — განაცხადა მერმა.
ერთ-ერთი მაცხოვრებლის კითხვაზე, შესაძლებელია თუ არა გაუვალი ორმოების როგორმე მოსწორება, მერმა უპასუხა, რომ გზა საერთაშორისო მნიშვნელობისაა და ადგილობრივი თვითმმართველობის ბალანსზე არ ირიცხება.
„ეს არ არის მერიის გზა და მერია არ არის უფლებამოსილი მასზე ბიუჯეტის სახსრები დახარჯოს. რამდენადაც შესაძლებელი იყო, მერიამ საკუთარი ტექნიკითა და მოსახლეობის თხოვნით არხები გაჭრა, რათა წყალი არ დაგუბებულიყო და ღრმა ორმოები არ წარმოქმნილიყო, ასევე გაწმინდა არხები. ისევ და ისევ, მოსახლეობასთან თანამშრომლობით, ვეცადეთ ამ პრობლემის მოგვარებას. სოფელ სულდასა და კარწახში, რამდენადაც ეს შესაძლებელი იყო, ორმოები მოვასწორეთ. უკვე 10–20 დღეა სამუშაოები შეჩერებულია და საკითხი გადაჭრის სტადიაშია. მოითმინეთ. მე არ მაქვს პასუხი კითხვაზე, თუ როდის დაიწყება სამუშაოები, რადგან ეს სახელმწიფოებრივი მნიშვნელობის გზაა“, — განაცხადა მერმა.
მაცხოვრებლებმა მოითხოვეს, რომ ცენტრალურ ხელისუფლებას გაეცა პასუხი კითხვებზე, თუ კონკრეტულად როდის უნდა დაიწყოს სამუშაოები და როდის დასრულდება ისინი. ამაზე მერმა უპასუხა, რომ ცენტრალურ ხელისუფლებაში იციან პრობლემის შესახებ.
საბოლოოდ, მაცხოვრებლები დაიშალნენ და თურქეთის საზღვრისკენ მიმავალი გზა აღარ გადაუკეტავთ.
ამის შემდეგ გზაზე გრეიდერმა დაიწყო მუშაობა, რომელიც ორმოებს ასწორებდა. როგორც Jnews-მა დააზუსტა, გრეიდერი შემთხვევის ადგილზე ახალქალაქის მერიამ გაგზავნა.
შეგახსენებთ, რომ დღეს დღისით, იმ სოფლების დაახლოებით 80 მცხოვრები, რომლებზეც ახალქალაქი–კარწახის (თურქეთის საზღვრისკენ მიმავალი) ავტომაგისტრალი გადის, სოფელ ვაჩიანთან შეიკრიბა და მისი გადაკეტვა დააპირა. ადგილზე ასევე იმყოფებოდა საპატრულო პოლიციის რამდენიმე ეკიპაჟი. სამართალდამცავები ადგილობრივებს გზის გადაკეტვისგან თავის შეკავებას სთხოვდნენ. ადგილობრივი მცხოვრებლების პროტესტის მიზეზი გზაა, რომელიც უკვე რამდენიმე წელია გაუვალ მდგომარეობაშია.
მანამდე, სოფელ სულდის მცხოვრებთა საინიციატივო ჯგუფმა მიმართვა გაუგზავნა საქართველოს პრემიერ-მინისტრს, რეგიონული განვითარებისა და ინფრასტრუქტურის სამინისტროსა და საავტომობილო გზების დეპარტამენტს, ახალქალაქი–კარწახის საერთაშორისო გზის რეაბილიტაციისთვის სასწრაფო ზომების მიღების მოთხოვნით. რამდენიმე დღეში მიმართვას ხელი 115-მა ადამიანმა მოაწერა, მათ შორის ჯავახეთის სხვადასხვა სოფლისა და ქალაქის, ასევე სომხეთის დედაქალაქის მცხოვრებლებმა, საერთაშორისო გადაზიდვების მძღოლებმა და ტურისტებმა. წერილში მოსახლეობა პასუხისმგებელ სტრუქტურებს სთხოვს, შეიკრიბონ და იპოვონ სწრაფი და სრულფასოვანი გამოსავალი, ანუ მოახდინონ ახალქალაქი–კარწახის გზის რეაბილიტაცია. ისინი წერილში ხაზგასმით აღნიშნავენ, თუ რამდენად გააუარესა გზის მდგომარეობამ მათი ცხოვრების ხარისხი.
იმის შესახებ, რომ ახალქალაქი–კარწახის გზამ ნგრევა დაიწყო, Jnews-ი ჯერ კიდევ 2018 წელს წერდა და ამ თემას დღემდე აშუქებს. ამ წლების განმავლობაში გზის მდგომარეობა რამდენჯერმე გაუარესდა, რედაქციამ არაერთხელ მიმართა ყველა შესაძლო ინსტანციას და მიიღო კიდეც პასუხები, თუმცა საფუძვლიანი რეაბილიტაცია არ ჩატარებულა. 2023 წლიდან საქართველოს საავტომობილო გზების დეპარტამენტი პასუხობს, რომ სარეაბილიტაციო სამუშაოები „უახლოეს მომავალში“ დაიწყება. თუმცა, ეს „მომავალი“ დღემდე არ დამდგარა, გზა კი სიტყვის პირდაპირი მნიშვნელობით ყოველდღიურად ინგრევა.
ახალქალაქი–კარწახის საავტომობილო გზა 2010 წელს აშენდა. კაპიტალური რემონტი მხოლოდ სოფელ ვაჩიანის მონაკვეთზე ჩატარდა, დანარჩენ ადგილებში კი მხოლოდ ორმოული შეკეთება სრულდებოდა. თუმცა, იმ კაპიტალური რემონტიდანაც პრაქტიკულად აღარაფერია დარჩენილი.
აღსანიშნავია, რომ 2022, 2023 და 2024 წლებში, მანამდე გამოცხადებული ტენდერების თანახმად, აღნიშნული გზის მონაკვეთების რეაბილიტაციას კომპანიები „ჯავახავტოგზა“ და „არალი“ ახორციელებდნენ. თუმცა, ორივე კომპანიის მუშაობის შედეგი შეუმჩნეველი აღმოჩნდა. ამ გზაზე მოძრავი მძღოლების უკმაყოფილება არ წყდება. ცალკეულ ადგილებში სამუშაოები ან სერიოზული დარღვევებით ჩატარდა, ან საერთოდ არ შესრულებულა.
კომპანია „არალი“, რომელსაც ახალქალაქი–კარწახის გზის რეაბილიტაცია 2023 წელს უნდა განეხორციელებინა, ორჯერ დაჯარიმდა. საავტომობილო გზების დეპარტამენტში მაშინ პირობას დებდნენ, რომ პრობლემური მონაკვეთები და მთელი გზა შეკეთდებოდა, თუმცა პრაქტიკაში ვითარება დღემდე არსებითი ცვლილებების გარეშე რჩება.
