სომხეთის მთავრობამ დაამტკიცა თითქმის 5 მილიარდი დრამის (14 მილიონი დოლარი) გამოყოფა სახელმწიფო მოხელეების პრემიებისთვის 2026 წლის პირველი ნახევრისთვის, მათი საქმიანობის შეფასების სისტემის ფარგლებში. ხუთშაბათს მიღებული გადაწყვეტილება აღნიშნავს მუშაობის შედეგების მიხედვით ბონუსების გაცემის მორიგ რაუნდს, რაც ხდება მთავრობის მისამართით გაჟღერებული მუდმივი კრიტიკის ფონზე, რაც შეფასების შედეგებისა და ინდივიდუალური განაცემების გამჭვირვალობის ნაკლებობას უკავშირდება.
მთავრობის დასაბუთების თანახმად, პროგრამა მიზნად ისახავს სახელმწიფო მართვის სისტემის ეფექტიანობის ამაღლებას იმ თანამშრომელთა აკადემიური და პროფესიული განვითარების მხარდაჭერით, რომლებიც წახალისებას იღებენ. გავრცელებული ინფორმაციით, მოხელეები ვალდებულნი არიან ბონუსის 10% პროფესიულ განვითარებაზე დახარჯონ.
სისტემა 2025 წელს შემოიღეს და მას შემდეგ მინისტრებმა და სხვა მაღალჩინოსნებმა ბონუსების სახით რამდენიმე ათასი დოლარი მიიღეს.
პრემიერ-მინისტრ ნიკოლ ფაშინიანისთვის, მინისტრთა კაბინეტის წევრებისთვის, გუბერნატორებისთვის, დეპუტატებისა და სხვა მაღალჩინოსნებისთვის გაცემული ზუსტი თანხები, როგორც წესი, ცნობილი ხდება მხოლოდ ქონებრივი დეკლარაციებიდან ან პრესბრიფინგებზე გაკეთებული შემთხვევითი კომენტარებიდან, სადაც ჩინოვნიკები ხშირად უარს ამბობენ კონკრეტული ციფრების დასახელებაზე.
ამ თემამ ფართო საზოგადოებრივი ყურადღება პირველად 2025 წლის დეკემბერში მიიპყრო, როდესაც ოპოზიციონერმა დეპუტატებმა განაცხადეს, რომ მიიღეს 3 მილიონ დრამზე მეტი (7 800 აშშ დოლარი), რაც ფარავდა მათ დეკემბრისა და იანვრის ხელფასებს, ასევე ორმაგ სადღესასწაულო პრემიებს.
ამ განაცემებმა საზოგადოებრივი კრიტიკა გამოიწვია; ოპონენტები ამტკიცებდნენ, რომ მთავრობა მოხელეებს უხვი ბონუსებით აჯილდოებს მაშინ, როდესაც პენსიები დაბალი რჩება და სიღარიბე ნარჩუნდება.
კრისტინე ვარდანიანმა, ოპოზიციონერმა დეპუტატმა ფრაქცია „სომხეთის ალიანსიდან“, ამ თანხის გაცემას პარლამენტში მისი მუშაობის განმავლობაში უპრეცედენტო უწოდა.
საერთო ჯამში, მთავრობამ 3,6 მლრდ დრამი (9,5 მლნ დოლარი) გამოყო 2025 წლის პირველი ნახევრის პრემიებისთვის. მედიის ცნობით, იმ პერიოდში პაკეტი მოიცავდა 12 მილიონ დრამზე მეტ (32 000 დოლარი) პრემიას ფაშინიანისთვის და 6-დან 7 მილიონ დრამამდე (16 000–19 000 დოლარი) მისი კაბინეტის ზოგიერთი მინისტრისთვის.
ფართო კრიტიკის მიუხედავად, პრემიების მეორე რაუნდი მარტში დამტკიცდა — ივნისში სომხეთში გამართული საპარლამენტო არჩევნების წინ, როდესაც მთავრობამ 4,6 მლრდ დრამი (12 მლნ დოლარი) დაამტკიცა დამატებითი ბონუსების სახით 2025 წლის მეორე ნახევრისთვის.
ამ განაცემებმა, რომლებიც სახელმწიფო სარეზერვო ფონდიდან არჩევნებამდე ცოტა ხნით ადრე განხორციელდა, მკვეთრი კრიტიკა გამოიწვია ოპოზიციური ფიგურებისა და საზედამხედველო ორგანიზაციების მხრიდან, რომელთაგან ზოგიერთმა ეს ფაქტი „პოლიტიკური კორუფციის“ ფორმად შეაფასა.
ავტორი: მარიამ ნიკურაძე
