დღეს, 2 ივნისს, ახალქალაქში ბაქო–თბილისი–ყარსის რკინიგზის ოფიციალური გახსნა გაიმართა.
გახსნის ცერემონიაში მონაწილეობა მიიღეს საქართველოს პრემიერ-მინისტრმა ირაკლი კობახიძემ, საქართველოს ეკონომიკისა და მდგრადი განვითარების მინისტრმა მარიამ ქვრივიშვილმა, აზერბაიჯანის ციფრული განვითარებისა და ტრანსპორტის მინისტრმა რაშად ნაბიევმა, თურქეთის ტრანსპორტისა და ინფრასტრუქტურის მინისტრმა აბდულკადირ ურალოღლუმ, სომხეთის ტერიტორიული მართვისა და ინფრასტრუქტურების მინისტრმა დავით ხუდათიანმა, სომხეთის რესპუბლიკის საგანგებო და სრულუფლებიანმა ელჩმა საქართველოში აშოტ სმბატიანმა, საქართველოს პარლამენტის დეპუტატმა ახალქალაქიდან და ნინოწმინდიდან სამველ მანუკიანმა, ახალქალაქის მუნიციპალიტეტის ადგილობრივი თვითმმართველობის ხელმძღვანელობამ და სხვა სტუმრებმა.
დამსწრეებმა პროექტის მონაწილეებს ბაქო–თბილისი–ყარსის რკინიგზის გახსნა მიულოცეს, პარტნიორ ქვეყნებს თანამშრომლობისთვის მადლობა გადაუხადეს და რეგიონული სატრანსპორტო კავშირების განვითარებისთვის პროექტის მნიშვნელობას გაუსვეს ხაზი.
საქართველოს ეკონომიკისა და მდგრადი განვითარების მინისტრმა მარიამ ქვრივიშვილმა ხაზგასმით აღნიშნა, რომ ბთყ წარმოადგენს მნიშვნელოვან დამაკავშირებელ რგოლს ცენტრალურ აზიასა და ევროპას შორის.
ბაქო–თბილისი–ყარსის სარკინიგზო მაგისტრალის პროექტის რეალიზაცია 2007 წელს დაიწყო.
ბთყ-ის საერთო სიგრძე 826 კილომეტრს შეადგენს. პროექტის ფარგლებში აშენდა ახალი, 105-კილომეტრიანი სარკინიგზო შტო, საიდანაც 76 კილომეტრი თურქეთის ტერიტორიაზე გადის, ხოლო 29 კილომეტრი — საქართველოს ტერიტორიაზე. გარდა ამისა, საქართველოში რეკონსტრუქცია ჩაუტარდა ახალქალაქი–მარაბდა–თბილისის რკინიგზის 183-კილომეტრიან მონაკვეთს, რამაც მისი გამტარუნარიანობის წელიწადში 15 მილიონ ტონა ტვირთამდე გაზრდა გახადა შესაძლებელი.
სულ ახლახან სომხეთის პრემიერ-მინისტრმა ნიკოლ ფაშინიანმა განაცხადა ახალქალაქი–ყარსის სარკინიგზო მარშრუტის შესაძლო გახსნის შესახებ, სომხური ექსპორტისა და იმპორტის უზრუნველსაყოფად.
