ახალქალაქის მუნიციპალიტეტში ფერმერები კარტოფილის მასობრივი მოსავლის აღებისთვის ემზადებიან, თუმცა გადაუღებელი წვიმები სოფლების უმეტესობაში მოსავლის აღების დაწყების საშუალებას ჯერჯერობით არ იძლევა. მოსავლის აღების შეფერხების ფონზე აგრარიელებს შესასყიდი ფასის შემცირებაც აწუხებთ: ფერმერების თქმით, ახლა კარტოფილს კილოგრამზე დაახლოებით 50–60 თეთრად ყიდულობენ, მაშინ როდესაც სეზონის დასაწყისში ფასი 1 ლარს აღწევდა.
ახალქალაქის მუნიციპალიტეტში ახლა მოსავლის აღების დროა. ცალკეულ სოფლებში, სადაც კარტოფილის ადრეული ჯიშები მოჰყავთ, მოსავლის აღება უკვე დაიწყო. სოფლების უმეტესობაში კი, განსაკუთრებით დაშორებულ სოფლებში, ფერმერები ამინდის პირობების გაუმჯობესებას ელოდებიან, რათა მოსავლის აღება დაიწყონ.
ასეთი სიტუაციაა სოფლებში: მოდეგამი, იხტილა, კარწახი, აგანა, სულდა, აზავრეთი და სხვა.
არამაის ჩახალიანი სოფელ მოდეგამიდან ამბობს, რომ მათ სოფელში კარტოფილის ამოღება ჯერ არ დაწყებულა.
„წვიმები საშუალებას არ გვძლევს, ნიადაგი არ შრება, ყოველდღე წვიმს. თუმცა უკვე მოსავლის აღების დროა. კარგი მოსავლის მოლოდინი გვაქვს. ფასის შესახებ უბრალოდ გავიგეთ, რომ „ქვედა“ სოფლებში ფასი უკვე დაეცა. ჩვენს სოფელში სხვა სოფლებთან შედარებით ბევრს არ ამუშავებენ, რადგან მიწა ცოტა გვაქვს. მე, მაგალითად, 1,50 ჰექტარი დავთესე“, — განაცხადა არამაის ჩახალიანმა.
სოფელ იხტილაში, არტავაზ დარბინიანის თქმით, ფერმერები ასევე ელოდებიან ამინდის პირობების ნორმალიზებას, რათა კარტოფილის მოსავლის აღება დაიწყონ.
მსგავსი სიტუაციაა სოფელ ხავეთშიც. თუმცა ზოგიერთმა ფერმერმა ამინდის გაუარესებამდე მოასწრო მოსავლის აღების დაწყება და ნაწილის გაყიდვაც კი.
გუშინდელი მონაცემებით, სოფელ ხავეთში ერთი კილოგრამი კარტოფილი 60 თეთრად გაყიდეს.
ფერმერები ცდილობენ ფასის შენარჩუნებას და ერთმანეთთან შეთანხმებას, თუმცა ჯერჯერობით ეს არ გამოსდით. ფასის შემცირების მიზეზები განსხვავებულია.
მთლიანობაში, წელს მოსავლიანობა კარგად ფასდება: ზოგ ფერმერს მაღალი მოსავალი აქვს, ზოგს კი – დამაკმაყოფილებელი.
ფერმერი და აგრონომი ეგიშ აღაჯანიანი ამბობს, რომ წელს შესანიშნავი მოსავალი მიიღო. მისი თქმით, სეზონის დასაწყისში კარტოფილის ფასი კილოგრამზე 1 ლარს შეადგენდა, თუმცა ახლა ის 50 თეთრამდე შემცირდა.
„მოსავალი კარგია, ფასიც კარგი იყო, მაგრამ ახლა ფასის საქმე ცუდად არის. მყიდველები ყოველთვის არიან, უბრალოდ ჩვენ ვერ შევინარჩუნეთ ფასი. აქედან 60–70 თეთრად ყიდულობენ, ზოგმა კი თბილისში წაიღო და 50 თეთრად ყიდის“, — ამბობს ეგიშ აღაჯანიანი.
აღაჯანიანის თქმით, მის ნაკვეთზე მოსავლიანობა ერთი ჰექტარიდან 600 ცენტნერს შეადგენს.
გარიკ მუსიკიანმა სოფელ სულდადან განაცხადა, რომ კარტოფილის მოსავლის აღების დაწყებას ხვალ გეგმავს, თუ ამინდის პირობები ამის საშუალებას მისცემს.
„ჩვენს სოფელში კარტოფილის ამოღება უკვე თანდათან იწყება. მე უკვე შევთანხმდი, ხვალ დავიწყებ, თუმცა წელს მუშები ჯერ ცოტა მყავს, მაგრამ დაწყებას მაინც ვაპირებ. მყიდველები არ არიან. მოსავალი კარგია. ამბობენ, ფასი 55 თეთრამდე დაეცაო. ფასის შენარჩუნება ვერ მოხერხდა. პატარა ფერმერებსაც კი წვიმების ეშინიათ და მუშებს ქირაობენ, რომ მოსავალი სწრაფად აიღონ. კარგი იქნებოდა, ფასის შენარჩუნება რომ შეგვძლებოდა“, — განაცხადა გარიკ მუსიკიანმა.
წელს გარიკ მუსიკიანმა კარტოფილი 10 ჰექტარზე დათესა. მისი თქმით, მუშახელის დეფიციტია, ხოლო ერთი სამუშაო დღის ღირებულება 80–90 ლარს შეადგენს.
ფერმერები აღნიშნავენ, რომ წელს კარტოფილის მოსავლის აღება გასულ წელთან შედარებით გვიან დაიწყო.
გარიკ მუსიკიანი მიიჩნევს, რომ ბაზარს დიდწილად თვითონ ფერმერები აყალიბებენ.
„ბაზარი შენს ხელშია. თუ 80 თეთრად გაყიდი, რა თქმა უნდა, 80 თეთრადაც გაიყიდება. თუმცა ფასის შენარჩუნება ერთი ფერმერის ძალებს აღემატება. მუშებს ყოველდღე სჭირდებათ გადახდა, ამიტომ იძულებულნი არიან იაფად გაყიდონ და იმაზეც კი არ ფიქრობენ, რომ არაფერი რჩებათ. არავის დაუთვლია, რა ჯდება ერთი კილოგრამი კარტოფილი. მერე ყველაფერს დაითვლიან და ნახავენ, რომ შემოსავალი ხარჯებს ვერ ფარავს“, – დასძინა გარიკ მუსიკიანმა.
ფერმერები იმედოვნებენ, რომ ამინდის გაუმჯობესებასთან ერთად კარტოფილის მოსავლის აღება უფრო აქტიურად დაიწყება, ხოლო ფასის ირგვლივ სიტუაცია შეიცვლება. თუმცა ჯერჯერობით მათ ერთდროულად რამდენიმე პრობლემის გადაჭრა უწევთ – მოასწრონ მოსავლის აღება ამინდის გაუარესებამდე, იპოვონ მუშები და გაყიდონ კარტოფილი ისეთ ფასად, რაც წარმოების ხარჯებს დაფარავს.
