სარგის მანასიანი, რომელსაც სოფელში ყრმობიდანვე დაშნაკს ეძახდნენ, თავისი უნიკალური ფიზიკური მახასიათებლებით არა მარტო თანატოლებს, არამედ ბევრ ახალგაზრდას სჯობნის.
ბაბუა სარგისი ბავშვობიდან სპორტს მისდევდა, ახალგაზრდობაში ბევრ შეჯიბრში მიიღო მონაწილეობა და გაიმარჯვა. მას იცნობენ არა მარტო სოფელ ხანდოში, არამედ მთელ რეგიონში.
„სოფელში ვერავინ დამამარცხა. ძელზე აზიდვა 30-ჯერ გავაკეთე. ახლაც კი შემიძლია ჩემი ასაკის ყველა ადამიანს ვაჯობო.”
სოფლის ახალგაზრდები მასზე განსაკუთრებული სიამაყით საუბრობენ:
„მოზარდები ამბობენ, რომ ბაბუა დაშნაკი ახალგაზრდობაში ფიზიკურად ძალიან ძლიერი იყო, ახლაც ცოტანი ახერხებენ მისთვის მკლავის მოხრას, ამ ასაკში ის იმდენჯერ აკეთებს აზიდვებს, რამდენჯერაც მე ვერ ვახერხებ. ის ჩვენი სიამაყეა“, – ამბობს 20 წლის არმენ მარგარიანი.
სარგის მანასიანი მეუღლესთან ერთად ხანდოში ცხოვრობს. ჰყავს 3 შვილი და 11 შვილიშვილი, რომლებიც საზღვარგარეთ ცხოვრობენ. აიამაყით ამბობს, რომ შვილიშვილები ძალიან კარგად სწავლობენ, მაგრამ სპორტი არცერთს არ აურჩევნია.
“ზარმაცები არიან, სპორტს არ მისდევენ”, – ხუმრობს ბაბუა.
„ის ჩვენთვის მაგალითია ვივარჯიშოთ და ვიცხოვროთ ჯანსაღი ცხოვრების წესით“, – ამბობს ხანდოელი ახალგაზრდა, ჰამბარცუმ საჰარიანი.
ბაბუა სარგისი ახალგაზრდობაში ძალოსნობაზე ოცნებობდა, მაგრამ ფინანსური პრობლემების გამო პროფესიულ სპორტით ვერ დაკავდა. 50 წლის განმავლობაში სოფელში ტრაქტორის მძღოლად მუშაობდა, პარალელურად დაკავებული იყო საყვარელი გატაცებით – სპორტით.
