საზღვრისპირა სოფელ კარწახის სურბ ჰოვანეს კარაპეტის ეკლესიის კარები წელიწადნახევარია ხალხისთვის დაკეტილია, ყველაფრის მიზეზი სახურავია, რომელიც ორი რეაბილიტაციის შემდეგ ვერ მოახერხეს ისე გადახურვა, რომ წყალი არ წვეთავდეს. ხატები და ყველაფერი, რაც შიგნით არის, სინესტეში ზიანდება.
Jnews-ი მრავალი წლის განმავლობაში ადევნებს თვალს ახალქალაქის მუნიციპალიტეტის ერთ-ერთ ულამაზეს წმინდა ჰოვანეს კარაპეტის ეკლესიის ბედს. პირველი მასალა 2017 წელს იყო გამოქვეყნებული, მაშინ ეკლესიის კედლებიც სველი იყო, ხოლო სახურავი მთლიანად წვეთავს. არქიტექტურული თვალთახედვით უნიკალური მშენებლობა, გარემონტდა, მაგრამ პრობლემა არ მოგვარებულა.
2012 წელს ძველი საფარი შეიცვალა ახლით, ამან არ გაამართლა მოლოდინი და სახურავმა კვლავ დაიწყო გაჟონვა. ეკლესიის კარებს მიღმა ხავსისა და ობის ნამდვილი სამეფო იყო. კედლები ყველგან ხავსით იყო დაფარული, სვეტებიდან წყალი წვეთავდა, ხატები „ტიროდნენ“.
Jnews-მა კარწახის ტაძრის შესახებ მეორედ 2020 წელს დაწერა. მოქმედი ტაძრის შიგნით წყალი იდგა. მოსახლეობამ და ჯავახეთში სომხური სამოციქულო ეკლესიის წინამძღვარმა წყალში „დამხრჩვალი“ ეკლესიის დახმარებისკენ მოუწოდეს. ახალქალაქის რაიონის სოფელ კარწახში, სურბ ჰოვანეს კარაპეტის ეკლესიის რესტავრაციისთვის ანგარიში გაიხსნა. თუმცა, როგორც ირკვევა, მაშინ გაკეთებულმა რემონტმა, რამდენიმე ხნის შემდეგ, ისევ გაჟონა.
„ამ დროისთვის ეკლესია არ ფუნქციონირებს. უკვე წელიწადნახევარია. სახურავი მთლიანად მწყობრიდან არის გამოსული. კრამიტით არის გადახურული, ისინი ერთმანეთს დაშორდა, ამიტომ წყალი და თოვლი მაშინვე აღწევს შიგნით. ეკლესია მთლიანად დაფარულია ობით. ეკლესიამ წყალი შთანთქა. ამჟამად არ გვაქვს ინფორმაცია, ჩატარდება თუ არა ტაძრის რეაბილიტაცია. ბოლოს რეაბილიტაცია 6-7 წლის წინ ჩატარდა, მაგრამ როგორც ჩანს, არასწორად გაკეთდა, სახურავი არასწორად იყო გაკეთებული. ამიტომ ეკლესიამ ისევ შთანთქა წყალი, რაც გაკეთდა განულდა“, – ამბობს სოფელ კარწახის სასულიერო პირი, მღვდელი თადევოს ტერ-მკრტჩიანი.
სოფელ კარწახის მკვიდრებმა კვლავ დაიწყეს თანხების შეგროვება ეკლესიის სახურავის შესაკეთებლად. ანგარიშები გაიხსნა რუსეთსა და სომხეთში, ფულს სოფელშიც აგროვებენ. მსურველებს სურბ ჰოვანეს კარაპეტის უნიკალური ეკლესიის შენარჩუნებაში შეუძლიათ შეიტანონ წვლილი.
„თავდაპირველად, ალბათ, ფული უნდა შევაგროვოთ, მერე ნებართვისთვის მივმართოთ. მიმართავს სოფლის კომისარი. პრობლემა ის არის, რომ სახურავი ჟონავს, მაგრამ გარემონტდება თუ არა ეკლესია მთლიანად? ეს ყველაფერი შეგროვებულ თანხაზეა დამოკიდებული“, – ამბობს სოფელ კარწახის დეპუტატი ვარდან პაპოიანი.
მსურველებს, ვისაც კარწახელების დახმარება სურს, რომ ეკლესია დანგრევისგან გადაარჩინოს, თანხის გაგზავნა შეუძლიათ შემდეგ ანგარიშებზე 2202206841608818 რუსეთში,+37494009388 სომხეთში.
აღვნიშნავთ, რომ სოფელ კარწახში, სურბ ჰოვანეს კარაპეტის ეკლესია 2012 წლის 14 ივლისს აკურთხეს. ეკლესიის სახურავი მთლიანად გადახურულია ქვის კრამიტით. სოციალიზმის დროს ეკლესია ხელისუფლების იურისდიქციის ქვეშ მოექცა, 1929 წელს ეკლესია დაიხურა, 1933 წელს კი საწყობად გადაკეთდა. 1992 წლიდან ეკლესია დავიწყებაშია და მხოლოდ 20 წლის შემდეგ აღადგინეს და გაიხსნა. დღეს ის XIX საუკუნის 30-იან წლებში დაარსებული მოქმედი ეკლესიაა, რომელიც კვლავ დროებით დაკეტილია.
