ახალქალაქის მუნიციპალიტეტის მერიამ ანაზღაურებადი სტაჟირების სახელმწიფო პროგრამაში მონაწილეობის მისაღებად ორი ახალგაზრდა სპეციალისტი შეარჩია.
წარდგენილი 40 განაცხადიდან გასაუბრების ეტაპზე ოთხი კანდიდატი გადავიდა, რომელთაგან ორმა საბოლოოდ დაიწყო სამთვიანი ანაზღაურებადი სტაჟირება შესყიდვების სამსახურსა და ეკონომიკის სამსახურში. შესყიდვების სამსახურში სტაჟირებას რუზანა ხანოიანი გადის, ხოლო ეკონომიკის სამსახურში — სუზანა თორვანდიანი. ახალქალაქის მუნიციპალიტეტის მერიის ადმინისტრაციის უფროსის, ვაჩაგან წორმუტიანის განცხადებით, დანარჩენი კანდიდატები დადგენილ მოთხოვნებს ვერ აკმაყოფილებდნენ.
სტაჟირება, პირველ რიგში, არის შესაძლებლობა ახალგაზრდებისთვის, გაეცნონ სახელმწიფო დაწესებულების მუშაობას, ხოლო ორგანიზაციისთვის — გამოავლინოს პოტენციური სპეციალისტები. ვნახოთ, როგორ გამოავლენენ ისინი თავიანთ შესაძლებლობებს სამი თვის განმავლობაში. ჩვენ მათ პირდაპირ სამუშაოზე ვერ მივიღებთ, რადგან ამისთვის შესაბამისი პროცედურაა გათვალისწინებული. გარდა ამისა, მუნიციპალიტეტში შესაბამისი ვაკანსია უნდა იყოს“, — განაცხადა ვაჩაგან წორმუტიანმა.
მერიის ინფორმაციით, ამჟამად ახალქალაქის მუნიციპალიტეტში სხვადასხვა სამსახურში ხუთი ვაკანსიაა. ერთ-ერთი მათგანი შესყიდვების სამსახურშია, სადაც ახლა პროგრამის ერთ-ერთი მონაწილე გადის სტაჟირებას.
სტაჟირება სამ თვეს — დეკემბრის ბოლომდე გაგრძელდება.
აღვნიშნავთ, რომ ანაზღაურებადი სტაჟირების სახელმწიფო პროგრამა საქართველოში პრემიერ-მინისტრის ინიციატივით 2024 წლიდან ხორციელდება. პროგრამის ძირითადი მიზანია უმაღლესი სასწავლებლების ახალკურსდამთავრებულებს მიეცეთ საშუალება, მიიღონ პრაქტიკული სამუშაო გამოცდილება სახელმწიფო დაწესებულებებში. ხელისუფლება ასევე აღნიშნავს, რომ პროგრამა მიმართულია საჯარო სექტორში ახალგაზრდა სპეციალისტების მოსაზიდად.
