სად არის რეგიონში ყველაზე მაღალი და ყველაზე დაბალი იპოთეკური განაკვეთები?

საქართველოს მეზობელ ქვეყნებს შორის იპოთეკური სესხების საშუალო წლიური საპროცენტო განაკვეთი ყველაზე მაღალი თურქეთშია, ხოლო ყველაზე დაბალი — აზერბაიჯანში, რასაც კვლევითი ორგანიზაცია Numbeo-ს განახლებული სტატისტიკური მონაცემები აჩვენებს.
აღსანიშნავია, რომ თურქეთი საპროცენტო განაკვეთების მიხედვით მსოფლიო ლიდერებს შორისაა. იგი რეიტინგში შესულ 99 ქვეყანას შორის მეორე ადგილს იკავებს, საშუალო საპროცენტო განაკვეთით 41,76%.
საქართველო იპოთეკურ სესხებზე ყველაზე მაღალი საპროცენტო განაკვეთების მქონე მსოფლიოს 20 ქვეყანას შორისაა.
აზერბაიჯანი რეიტინგში 31-ე ადგილს იკავებს, სადაც იპოთეკური სესხების საშუალო წლიური საპროცენტო განაკვეთი 8,97%-ს შეადგენს.
საქართველო Numbeo-ს რეიტინგის ტოპ-20-ში შედის — იპოთეკური სესხების საშუალო წლიური საპროცენტო განაკვეთი 12,43%-ია, რითაც საქართველო მხოლოდ მეზობელ აზერბაიჯანს უსწრებს.
უფრო კონკრეტულად, საქართველოს მეზობელ ქვეყნებში იპოთეკური სესხების წლიური საპროცენტო განაკვეთი ასეთია:
თურქეთი – მე-2 ადგილი (41,76%);
რუსეთი – მე-6 ადგილი (21,31%);
სომხეთი – მე-14 ადგილი (13,64%);
საქართველო – მე-18 ადგილი (12,43%);
აზერბაიჯანი – 31-ე ადგილი (8,97%).
BusinessPressNews-ს მოჰყავს მსოფლიოს იმ ხუთი ქვეყნის მონაცემები, სადაც, Numbeo-ს თანახმად, იპოთეკური სესხები ყველაზე ძვირია:
არგენტინა – 62,68%;
თურქეთი – 41,76%;
უზბეკეთი – 24,12%;
ირანი – 23,03%;
ვენესუელა – 22,02%.
ქვეყნის სია, სადაც იპოთეკური სესხები შედარებით ყველაზე იაფია:
შვეიცარია – 2,06%;
იაპონია – 2,09%;
ტაივანი – 2,38%;
სინგაპური – 2,47%;
ბულგარეთი – 3,20%.