ქართული მოცვის მთავარ სარეალიზაციო ბაზრად რუსეთი რჩება. გარემოს დაცვისა და სოფლის მეურნეობის სამინისტროს მიერ გავრცელებული მონაცემები აჩვენებს, რომ წელს ექსპორტირებული მოცვის 95% სწორედ რუსეთზე მოდის.
უფრო დეტალურად, სამინისტროს თანახმად, 2026 წლის 1 მაისიდან 21 ივნისის ჩათვლით ექსპორტირებულია 2.2 ათასი ტონა მოცვი, 15.7 მლნ აშშ დოლარის ღირებულებით. წინა წლის ანალოგიურ პერიოდთან შედარებით, ექსპორტირებული მოცვის რაოდენობა 13%-ით (259 ტონა), ხოლო ღირებულება 12%-ით (1.7 მლნ აშშ დოლარი) გაიზარდა.
მოცვის ძირითადი საექსპორტო ქვეყნებია:
რუსეთი – 2 097 ტონა;
სომხეთი – 44 ტონა;
გერმანია – 30 ტონა;
არაბთა გაერთიანებული საამიროები – 18 ტონა.
სამინისტროს ცნობით, აღნიშნულ პერიოდში 1 კგ. მოცვის საშუალო საექსპორტო ფასი 7.1 დოლარია.
აღსანიშნავია, რომ წელს, არახელსაყრელმა ამინდებმა მოსავლის აღება შეაფერხა. სექტორის წარმომადგენლები BMG-სთან ამბობენ, რომ ქართული მოცვის სექტორი არაერთი გამოწვევის წინაშე აღმოჩნდა, დაწყებული კლიმატური პირობებით, დასრულებული სამუშაო ძალის მწვავე დეფიციტით.
მოცვის მწარმოებელთა ასოციაციის მოლოდინია, რომ წელს მოცვის მოსავალი 40%-ით გაიზრდება და ექსპორტი 10,000 ტონას მიაღწევს, მაშინ როცა წინა წელს 7 000 ტონა იყო მაჩვენებელი.
