სომხეთმა ოფიციალურად გახსნა თავისი პირველი ხელოვნური ინტელექტის (AI) ფაბრიკა
კომპანია Eleveight-მა ობიექტი გეღარქუნიქის პროვინციის სოფელ გაგარინში ააშენა.
ამ დროისთვის, ეს არის ხელოვნური ინტელექტის პირველი ქარხანა სამხრეთ კავკასიაში, რომელიც NVIDIA Blackwell B300 ტექნოლოგიას იყენებს. პროექტის პირველ ეტაპზე კომპანიამ $70 მილიონის ინვესტიცია განახორციელა, ხოლო 2026 წლის ბოლომდე კიდევ $50 მილიონის ინვესტირებას გეგმავს.
დეველოპერები მოელიან, რომ განვითარებული ინფრასტრუქტურა ახალ შესაძლებლობებს შეუქმნის ბიზნესს, სტარტაპებს, კვლევებსა და განათლებას.
ხელოვნური ინტელექტის ფაბრიკა შეესაბამება NVIDIA Reference Architecture-ის სტანდარტებს. შედეგად, საერთაშორისო ტექნოლოგიურ კომპანიებსა და კვლევით ჯგუფებს შეუძლიათ თავიანთი პროექტები სომხეთში გადაიტანონ და ისე აამუშაონ, რომ ტექნიკური ინტეგრაციის პრობლემებს არ წააწყდნენ.
სომხეთის მაღალტექნოლოგიური მრეწველობის სამინისტრომ და Eleveight AI-მ ურთიერთგაგების მემორანდუმს მოაწერეს ხელი.
„ხელოვნური ინტელექტის ფაბრიკა საფუძველს უყრის სომხეთის მომავალი ეკონომიკის ერთ-ერთ ქვაკუთხედს. ამ პროექტით სომხეთი ხდება არა მხოლოდ მოწინავე ტექნოლოგიების მომხმარებელი, არამედ მსოფლიო ბაზრისთვის მათი მწარმოებელი და მიმწოდებელიც“, — განაცხადა მხითარ აირაპეტიანმა.
