რუსთავში მეორადი საბურავების გადამუშავების მაღალტექნოლოგიური ქარხანა აშენდება – ინვესტიციები 10 მილიონ დოლარზე მეტი იქნება.
კომპანია „Rexol LLC“, საქართველოს გარემოს დაცვისა და სოფლის მეურნეობის სამინისტროს მხარდაჭერით, აქტიურად მუშაობს ქვეყანაში გადამამუშავებელი ინფრასტრუქტურის შექმნაზე და აქ ინოვაციური ტექნოლოგიების დანერგვაზე. პროექტი ინიცირებულია შემდეგი ორგანიზაციების მიერ: საქართველოს გაფართოებული მწარმოებელთა პასუხისმგებლობის Wasteless, თეგეტა მწვანე პლანეტა და ნარჩენების მართვის ბიზნეს ასოციაცია.
პროექტის ფარგლებში, რომელიც მიზნად ისახავს ავტომობილების აკუმულატორისა და საბურავების გადამამუშავებელი მაღალტექნოლოგიური საწარმოების შექმნას და განვითარებას, შპს Rexol აქტიურად თანამშრომლობს ბანკებთან, რის შედეგადაც პროექტში ჯამში დაახლოებით 30 მილიონი ლარის ინვესტიცია განხორციელდება და 50-მდე ადამიანი დასაქმდება.ინფრასტრუქტურის მშენებლობა რუსთავის ტერიტორიაზე იგეგმება, ის დაახლოებით ოთხნახევარ ჰექტარს დაიკავებს, განაცხადა – გარემოს დაცვის მინისტრის მოადგილემ სოლომონ პავლიაშვილმა.
მისივე თქმით, ავტომობილების აკუმულატორების სფეროში პროექტის კონტრაქტორი იტალიური კომპანია „Engitech LLC“-ია, რომელსაც გააჩნია მრავალწლიანი გამოცდილება და თანამედროვე ტექნოლოგიები.აღნიშნულია, რომ ქარხნის სიმძლავრე იქნება 12000 ტონა წელიწადში, რაც სრულად დაფარავს საქართველოს საჭიროებებს. პირველი ეტაპი ერთ წელიწადში დასრულდება და ქარხანა სრულად ამოქმედდება ხელშეკრულების რატიფიცირებიდან 18 თვის შემდეგ. საბურავების გადამუშავების სექტორში იგეგმება შესაბამისი ტექნიკის/აღჭურვილობის შეძენა თურქული კომპანიისგან.
