ივლისში ავტოექსპორტის მაღალი მაჩვენებლები შენარჩუნდა. ვიდრე აშშ-სა და ევროკავშირის სანქციების მე-11 პაკეტი ამოქმედდებოდა, როგორც ჩანს, რუსეთში ავტომობილების რეექსპორტი გაიზარდა კიდეც. ივლისში, საქართველოდან რუსეთში 13.3 მლნ დოლარის მსუბუქი ავტომობილების რეექსპორტია განხორციელებული, რაც წლის მაქსიმალური მაჩვენებელია. რუსეთში 2023 წლის 7 თვის მონაცემებით კი, 65.8 მლნ დოლარის 4 840 ავტომობილია გატანილი. 1 ავტომობილის საშუალო ფასი 13.5 ათასი დოლარია. 2022 წლის ამავე პერიოდში რუსეთში 22.29 მლნ დოლარის 1834 ავტომობილის რეექსპორტი იყო განხორციელებული.
ავტომობილების რეექსპორტი თვეების მიხედვით რუსეთში / 2023 წელი
რაც შეეხება ბელარუსს, ამ ქვეყანაში, რომელზეც ასევე ვრცელდება რუსეთ – უკრაინის ომის გამო დაწესებული სანქციები, 7 თვეში მხოლოდ 2.8 მლნ დოლარის ავტომობილებია გატანილი.
აღსანიშნავია, რომ აშშ-სა და ევროკავშირის მიერ დაწესებული სანქციების შესაბამისად, 1-ელი აგვისტოდან საქართველოს ტერიტორიიდან აიკრძალა აშშ-დან შემოყვანილი მანქანების რეექსპორტი რუსეთსა და ბელარუსში. 26 სექტემბრიდან კი, იკრძალება ევროკავშირიდან შემოყვანილი მანქანების რეექსპორტიც რუსეთსა და ბელარუსში. აკრძალვა ეხება 1.9 ლიტრზე მეტი მოცულობის ძრავის ახალი და მეორადი ავტომობილების გაყვანაც. ასევე სრულად აიკრძალა ელექტრომობილების და ჰიბრიდული ავტომობილების გაყვანა.
წელს ავტომობილების რეექსპორტი რეკორდულ ნიშნულზეა და 1.178 მლრდ დოლარს აღწევს. სულ საექსპორტო ბაზრებზე 60,475 ავტომობილია გატანილი. ავტოექსპორტში ზრდა 217%-ია. ავტომობილების რეექსპორტზე მოდის მთლიანი ექსპორტის 32.9%.
ავტომობილების რეექსპორტის ტოპ -10 ბაზარი
