დღეს, 23 მაისს, ახალქალაქი-კარწახის გზატკეცილზე, სოფელ ვაჩიანიდან კარწახის მიმართულებით, საქართველო-თურქეთის საგუშაგომდე, 800-მდე სატვირთო მანქანა დგას. როგორც საბაჟო კონტროლის სამსახურში განმარტავენ, მანქანების რიგის მიზეზი დიდი ნაკადია.
რამდენიმე დღეა 25-კილომეტრიანი საცობია შექმნილი. სატვირთოების მძღოლები საქართველო-თურქეთის საზღვარზე უკვე მეოთხე დღეა თავის რიგს ელოდებიან, ხოლო სოფელ ვაჩიანთან მეორე დღეა დგანან.
«იმის გამო, რომ საბაჟო-გამშვები პუნქტი – „ვალე“ დაკეტილია, დაგროვდა მანქანების დიდი რაოდენობა, ამასთან, გაიზარდა სატვირთო მანქანების ნაკადი. რუსეთის ნაცვლად, სატვირთო მანქანები ახლა საქართველოს ტერიტორიის გავლით დადიან, სხვა პრობლემა არ არის“, – განუცხადეს Jnews-ს საქართველოს საბაჟო კონტროლის სამსახურში.
Jnews-მა დღეს დაითვალა 800-მდე სატვირთო მანქანა, რომლებიც გზის მარჯვენა მხარეს იდგნენ. სოფელ ვაჩიანიდან საქართველო-თურქეთის საზღვრამდე გზაზე მოძრაობა ცალმხრივი გახდა.
