განათლების მინისტრის მოადგილის, ნუნუ მიცკევიჩის განცხადებით, სკოლებში ყველა რეკომენდაცია დაცულია და შესაბამისად, კორონავირუსის გამოვლენის მაჩვენებელი დაბალია.
მიცკევიჩი იმედოვნებს, რომ რისკები ასევე მინიმალური იქნება უმაღლეს საგანმანათლებლო სივრცეში.
პირველი მარტიდან საგანმანათლებლო სივრცეში დაბრუნების შესაძლებლობა გვეძლევა. უნივერსიტეტებს ეძლევათ თავისუფალი არჩევანის საშუალება, პრაქტიკული, ლაბორატორიულ – კლინიკური კომპონენტი ჩაატარონ აუდიტორიებსა და შესაბამის სივრცეებში. ამასთანავე, გამოცდები შეძლებისდაგვარად ჩატარდეს საუნივერსიტეტო სივრცეში. 15 მარტს, გვაქვს ჩანიშნული მეორე ეტაპი, რომელიც ეხება თეორიულ კომპონენტს, სადაც ძირითადად იგულისხმება ლექციები. უნივერსიტეტებს შეეძლებათ, მათივე გადაწყვეტილებით სრულად აღდგეს პროცესი უნივერსიტეტებში.
გაზაფხული რთული პერიოდია საგანმანათლებლო სისტემისთვის. როგორც მოგეხსენებათ, ჩვენ გვაქვს ინტერვალებით, ორკვირიანი შუალედით დაკვირვების საშუალება. ზოგადსაგანმანათლებლო სივრცე ადასტურებს, რომ უსაფრთხოების მაღალი ნორმებია დაცული. ყველა რეკომენდაცია დაცულია და სკოლებში ვირუსის გამოვლენის ძალიან დაბალი მაჩვენებელია. ვიმედოვნებთ, რისკები ასევე მინიმალური იქნება უმაღლეს საგანმანათლებლო სივრცეში“, – განაცხადა ნუნუ მიცკევიჩმა.
უმაღლესი და პროფესიული სასწავლებლები, კლინიკურ-პრაქტიკული, ლაბორატორიული პრაქტიკის აღდგენას და გამოცდების არადისტანციურ ფორმატში ჩატარებას შეძლებენ პირველი მარტიდან, ხოლო სასწავლო პროცესი აუდიტორიებში 15 მარტიდან აღდგება.
