კომპანია Georgian Water and Power-მა (GWP) აღიარა, რომ ტექნიკური და სისტემური ხარვეზების გამო მომხმარებელთა ნაწილს დავალიანება არასწორად დაერიცხა. კომპანია ბოდიშს იხდის და აცხადებს, რომ შეცდომით დარიცხული თანხები დაკორექტირდება. ინფორმაციას Sova News ავრცელებს.
7 სექტემბერს საქართველოს ენერგეტიკისა და წყალმომარაგების მარეგულირებელ ეროვნულ კომისიაში (სემეკი) განაცხადეს, რომ დაიწყო ბოლო დღეებში GWP-ის მიერ აბონენტებისთვის გაზრდილი თანხების მასობრივად დარიცხვის ფაქტების შესწავლა. კომისიაში მომხმარებლებისგან გაზრდილ ქვითრებთან დაკავშირებით უამრავი საჩივარი შევიდა. კერძოდ, ფიგურირებს 1500-1600 ლარის (570-610 დოლარი) ოდენობის თანხები. მოქალაქეთა თქმით, კომპანიაში მათ განუცხადეს, რომ ეს „კანალიზაციის გადასახადი“ იყო.
„თუ მოკვლევის შედეგად დადასტურდება, რომ შპს Georgian Water and Power-მა მოქმედ აბონენტებს ქსელზე მიერთების საფასური დაარიცხა, რაც ეწინააღმდეგება სემეკის რეგლამენტსა და წესებს, აღნიშნული დარიცხვები ჩამოიწერება — წყალმომარაგებისა და წყალარინების ქსელებში თვითნებური მიერთების შემთხვევების გარდა“, — განაცხადეს კომისიაში.
უწყებაში განმარტეს, რომ გადასახადების მასობრივი და დაუსაბუთებელი დარიცხვის ფაქტის დადასტურების შემთხვევაში, GWP-ის მიმართ კანონმდებლობით გათვალისწინებული „მკაცრი რეაგირების მექანიზმები“ ამოქმედდება. ამასთან, სემეკში განმარტეს, რომ მოკვლევა არ შეეხება იმ მომხმარებლებს, რომლებიც არ იხდიან გაწეული მომსახურების საფასურს ან არღვევენ კანონით დადგენილ წესებს.
როგორც Georgian Water and Power-ში განაცხადეს, 2026 წლის აგვისტოში კომპანია წყალარინების (კანალიზაციის) ქსელზე დარეგისტრირებული მიერთებების აღრიცხვასა და ინვენტარიზაციას ახორციელებდა.
„მონაცემთა დამუშავების პროცესში გამოვლინდა ტექნიკური და სისტემური ხარვეზები, რამაც უზუსტობები გამოიწვია. შედეგად, რიგ აბონენტებს დავალიანება არაკორექტულად დაერიცხათ. Georgian Water and Power აღიარებს დაშვებულ შეცდომას, ასწორებს ხარვეზს და ბოდიშს უხდის მომხმარებლებს შექმნილი სიტუაციის გამო“.
GWP-ში დაარწმუნეს, რომ კომპანიის შესაბამისი სამსახურები თითოეული აბონენტის შემთხვევას დეტალურად განიხილავენ.
„მომხმარებლები, რომლებსაც დავალიანება შეცდომით დაერიცხათ, SMS-შეტყობინებებს 10 სექტემბრის დღის ბოლომდე მიიღებენ, ხოლო დარიცხული თანხები გადაანგარიშდება. წინააღმდეგ შემთხვევაში, აბონენტებს შეუძლიათ მიმართონ ცხელ ხაზს ან GWP-ის სერვისცენტრებს“, — დასძინეს კომპანიაში.
აღვნიშნავთ, რომ 2022 წლიდან Georgian Water and Power-ის აქციების 80%-ს ესპანური კომპანია Aqualia ფლობს, ხოლო 20%-ს — საინვესტიციო ჰოლდინგი Georgia Capital.
შეგახსენებთ, რომ მსგავსი პრობლემები ახალქალაქში მოქმედ ზოგიერთ ბიზნესსაც შეექმნა და მათთვის დარიცხული თანხებიც ეტაპობრივად უქმდება.
