ნეპალში ძლიერი წყალდიდობისა და მეწყერის შედეგად დაღუპულთა რიცხვი 359-მდე გაიზარდა, – ინფორმაციას ნეპალის პოლიცია ავრცელებს.
პოლიციის ცნობით, მანამდე დაღუპულთა რაოდენობა 332-ს შეადგენდა. სტიქიამ განსაკუთრებით დააზარალა ქვეყნისა და ტიბეტის საზღვრის მიმდებარე ტერიტორიები.
ნეპალში სამძებრო-სამაშველო ოპერაციაში პოლიციის, არმიისა და შეიარაღებული პოლიციის 9 260 თანამშრომელია ჩართული. მაშველები დაზარალებულ რაიონებში გადარჩენილებს ეძებენ და სტიქიის შედეგად ჩახერგილი გზებისა და ნანგრევების გაწმენდას ცდილობენ.
ამასთან, ჩინეთის ხელისუფლება ნეპალ-ჩინეთის საზღვართან ტბის ახალი შესაძლო გადმოსვლის საფრთხეს აფასებს. ჩინეთის წყლის რესურსების სამინისტროს განცხადებით, ძლიერი წვიმების გაგრძელების შემთხვევაში ტბის ნაპირების გარღვევის მაღალი რისკია უახლოეს სამ დღეში.
