მუნიციპალური განვითარების ფონდმა ქვეყნის ექვს რეგიონში ერთდროულად 36 ახალი საბავშვო ბაღის მშენებლობაზე ტენდერები გამოაცხადა. პროექტების სავარაუდო ღირებულება 100 მილიონი ლარია.
საუბარია არა უბრალოდ ახალი შენობების აღმართვაზე, არამედ შესყიდვების ფარგლებში გათვალისწინებულია არსებული დეტალური საპროექტო დოკუმენტაციის კორექტირება და მის საფუძველზე შემდგომი სამშენებლო სამუშაოების განხორციელება. ანუ საქმე ეხება სრულფასოვან ინფრასტრუქტურულ ციკლს -პროექტების მომზადებიდან ობიექტების ჩაბარებამდე.
ახალი ბაღები 19 მუნიციპალიტეტში აშენდება: ქარელში, გურჯაანში, საგარეჯოში, ადიგენში, გორში, კასპში, ყვარელში, ლაგოდეხში, ახმეტაში, მარტვილში, აბაშაში, ხობში, სიღნაღში, ზუგდიდში, ნინოწმინდაში, ბორჯომში, წალკაში, სამტრედიასა და ხონში.
მშენებლობის დასრულების შემდეგ შექმნილი ინფრასტრუქტურა 2 ათასამდე ბავშვს თანამედროვე და უსაფრთხო პირობებით უზრუნველყოფს. ეს კი, ალბათ, პროგრამის მასშტაბის მთავარი მაჩვენებელია: საუბარია არა მხოლოდ კვადრატულ მეტრებსა და სამშენებლო კონტრაქტებზე, არამედ ათასობით ოჯახზე, რომელთათვისაც სკოლამდელი განათლების ხარისხი ელემენტარულით – უსაფრთხო და ნორმალურად აღჭურვილი შენობით იწყება.
ამასთან, მიმდინარე ტენდერები უფრო ფართო პროგრამის მხოლოდ ნაწილია. ფონდი გეგმავს ეტაპობრივად ააშენოს ახალი საბავშვო ბაღები სხვა მუნიციპალიტეტებშიც და გააგრძელოს სკოლამდელი განათლების ინფრასტრუქტურის განახლება.
რეგიონებისთვის ეს განსაკუთრებით მნიშვნელოვანია. საბავშვო ბაღების მდგომარეობა პირდაპირ კავშირშია არა მხოლოდ ბავშვების კომფორტთან, არამედ მშობლების სრულფასოვნად დასაქმების შესაძლებლობასთან, სკოლამდელი განათლების ხელმისაწვდომობასთან და, საბოლოო ჯამში, ადგილებზე ადამიანური კაპიტალის ხარისხთან. ამიტომ, ასეთ ინფრასტრუქტურაში განხორციელებულ ინვესტიციებს ბევრად უფრო ხანგრძლივი ეფექტი აქვს, ვიდრე ეს სამშენებლო ტენდერის ეტაპზე ჩანს.
ახლა მთავარი კითხვაა – რამდენად სწრაფად და ხარისხიანად გადაინაცვლებს პროექტები შესყიდვების პროცედურებიდან რეალურ სამშენებლო მოედნებზე. 100 მილიონი ლარი სერიოზული თანხაა და პროგრამის ეფექტიანობა უკვე გამოცხადებული ტენდერების რაოდენობით კი არ განისაზღვრება, არამედ იმით, თუ რამდენი ობიექტი აშენდება რეალურად დადგენილ ვადებში და ჯეროვანი ხარისხით.
მუნიციპალური განვითარების ფონდი იწვევს შესაბამისი გამოცდილებისა და კვალიფიკაციის მქონე სამშენებლო კომპანიებს გამოცხადებულ ტენდერებში მონაწილეობის მისაღებად.
