საქართველოში „ბოლო ზარის“ აღნიშვნა 20 მაისიდან დაიწყო. თითოეული სკოლა თავად წყვეტს, თუ როდის გამართოს ღონისძიება. Jnews ახალქალაქის 5 სკოლის დირექტორს ესაუბრა.
ახალქალაქის მუნიციპალიტეტის ყველა სკოლის კურსდამთავრებულთა ზუსტი რაოდენობა წელს ჯერ კიდევ არ არის განსაზღვრული, თუმცა, როგორც ახალქალაქის საგანმანათლებლო რესურსცენტრიდან შევიტყვეთ, კურსდამთავრებულთა რიცხვი დაახლოებით ისეთივე იქნება, როგორიც შარშან – 481 ადამიანი.
№1 სკოლაში „ბოლო ზარი“ 24 მაისს დაირეკება, ამინდის პირობების გამო დრო ჯერჯერობით დაზუსტებული არ არის. წელს №1 სკოლა 34 მოსწავლემ დაამთავრა, მათგან 6 ოქროს მედალზე პრეტენდენტია.
№2 სკოლაში „ბოლო ზარი“ 20 მაისს, ამინდის პირობებიდან გამომდინარე, 11:00-დან 12:00 საათამდე შუალედში დაირეკება. სკოლას 43 კურსდამთავრებული ჰყავს, მათგან 7 მედლის კანდიდატია.
№3 სკოლაში „ბოლო ზარი“ 22 მაისს დაირეკება, დრო ჯერ განსაზღვრული არ არის და ამინდზეა დამოკიდებული. №3 სკოლას 11 კურსდამთავრებული ჰყავს, მათგან ორი მედლის კანდიდატია.
№4 სკოლაში „ბოლო ზარი“ 20 მაისს, 11:00 საათზე დაირეკება. წელს №4 სკოლა 43-მა ადამიანმა დაამთავრა, მათგან 4 მედლის კანდიდატია.
№5 სკოლაში „ბოლო ზარი“ 21 მაისს დაირეკება. წელს სკოლამ 7 კურსდამთავრებული გამოუშვა. №5 სკოლას მედლის 1 კანდიდატი ჰყავს.
