ახალქალაქის გარეუბანში მდებარე დიდი ქართველი მწერლის, შოთა რუსთაველის ძეგლის მიმდებარედ სკვერის მოწყობის შესახებ გადაწყვეტილება ოთხი წლის წინ მიიღეს, თუმცა ამ პროექტის განხორციელება გაჭიანურდა.
2023 წელს გადაწყდა, რომ შოთა რუსთაველის ძეგლის შემოგარენი პარკად გადაქცეულიყო, სადაც დროს როგორც ადგილობრივები, ისე ტურისტები გაატარებდნენ. თუმცა, არსებობდა ერთი „მაგრამ“: ამ ტერიტორიაზე მისვლა მეტად რთულია მისი მაღალი მდებარეობისა და იმ მაგისტრალის გათვალისწინებით, სადაც მოძრაობა ძალიან ინტენსიურია.
მიუხედავად ამისა, ორწლიანი პროექტი 2024 წელს დაიწყო. მიწის სამუშაოები 154,369.69 ლარად შესრულდა. შედეგად, მიუხედავად იმისა, რომ ტენდერით გათვალისწინებული სამუშაოები დასრულდა, ტერიტორიის კეთილმოწყობა ბოლომდე არ მიყვანილა. საქმე ისაა, რომ მერიამ პროექტში ცვლილებები შეიტანა, რის გამოც გასულ წელს — 2025 წელს — ახალი ტენდერი უნდა გამოცხადებულიყო. შეცვლილი პროექტის თანახმად, ტერიტორია უნდა გაზრდილიყო, მოწყობილიყო განათებული სკვერი, ასევე ავტოსადგომი.
პროექტის ცვლილების შემდეგ პირველი ტენდერი 2025 წლის 17 ივნისს გამოცხადდა. ამ ელექტრონულ ტენდერში მონაწილეობა მხოლოდ შპს „მიკ 23“-მა მიიღო. სატენდერო კომისიამ განაცხადში წარდგენილ ხარჯთაღრიცხვაში უზუსტობები აღმოაჩინა. ამის გამო გადაწყდა ტენდერის შეწყვეტა და მისი ხელახლა გამოცხადება, გამართული დოკუმენტაციის წარდგენის მოთხოვნით.
მეორე ტენდერი 16 ივლისს გამოცხადდა, თუმცა არ შედგა. მესამე ტენდერი 6 აგვისტოს გამოცხადდა და წინადადებების მიღების ვადის ამოწურვის შემდეგ, ისიც ჩაიშალა. როგორც მაშინ მერიაში განაცხადეს, მიზეზი ის იყო, რომ წინადადებები არავინ წარადგინა.
„ახალქალაქის მუნიციპალიტეტში რუსთაველის ძეგლთან სკვერის რეკონსტრუქციის“ ტენდერი მეოთხე მცდელობაზე შედგა. ტენდერი მეოთხედ 26 სექტემბერს გამოცხადდა, წინადადებები კი 7 ოქტომბრამდე მიიღებოდა. მასში თბილისში მოქმედმა კომპანია „პარამეტრმა“ გაიმარჯვა — 440 000 ლარით. ტენდერის საწყისი ფასი 458 829 ლარს შეადგენდა. ახალი პროექტი ითვალისწინებს სკვერის ფართობის გაზრდას, განათებისა და სკამების დამონტაჟებას, ასევე გულის ფორმის ინსტალაციის განთავსებას. გარდა ამისა, დაგეგმილია სკვერამდე მიმავალი კიბის მშენებლობა, რომელიც ქალაქის ციხის ტერიტორიიდან დაიწყება და ქალაქის შესასვლელ მაჩვენებელთან დასრულდება.
პროექტის პირობების თანახმად, სამშენებლო სამუშაოები ხელშეკრულების გაფორმებიდან 150 კალენდარული დღის განმავლობაში უნდა დასრულებულიყო (100 დღე 2025 წელს და 50 დღე 2026 წელს — 1 მაისიდან). თუმცა, ხელშეკრულებას ხელი 2025 წლის 3 ნოემბერს მოეწერა, რაც ნიშნავს, რომ 2025 წელს სამუშაოებისთვის 100 დღე აღარ რჩებოდა. მიუხედავად 2025 წლის ნოემბერსა და დეკემბერში არსებული მშრალი და მზიანი ამინდებისა, სამუშაოები მაინც არ დაწყებულა.
ახალქალაქის მუნიციპალიტეტის ინფრასტრუქტურის, არქიტექტურისა და მშენებლობის სამსახურის უფროსის, არა მოვსისიანის თქმით, პროექტი განხორციელდება და ხელშეკრულება გაფორმებულია.
„იყო გარკვეული პრობლემები, რომელთა ნაწილი მეტ-ნაკლებად მოგვარდა, ბოლო ტენდერი კი უკვე ძალაშია. როგორც კი ამინდი დათბება და ხელსაყრელი პირობები შეიქმნება, სამუშაოები დაიწყება. ჩვენ გავაგრძელებთ პროექტის განხორციელებას ზემოდან ქვემოთ დაშვებული რკინის კიბეებით — ზუსტად ისე გავაკეთებთ, როგორც დაგეგმილია. რაც შეეხება ავტოსადგომის პრობლემას, ეს პროექტში შეტანილი არ არის, თუმცა მომავლის საკითხია. სკვერი მზად იქნება, ვნახავთ, როგორ წავა საქმე და თუ ავტოსადგომის საჭიროება დადგება, რამეს მოვიფიქრებთ“, — ამბობს არა მოვსისიანი.
