დღეს, 14 აპრილს, დედაენის დღის აღსანიშნავად, ახალქალაქის მომავლის სახლში ქართული კალიგრაფიის კონკურსი გაიმართა.
კონკურსი ახალქალაქის მუნიციპალიტეტის მერიასთან არსებულმა ახალგაზრდულმა კავშირმა, თავმჯდომარე თამარ მიქელაძესთან ერთად მოაწყო.
ღონისძიებაში 9 მონაწილე იღებდა მონაწილეობას: სოფლების, ზაკისა და ჩუნჩხის სკოლების მოსწავლეები, ასევე ახალქალაქის №3 ქართული და №4 სომხური სკოლების მოსწავლეები. მონაწილეებს 30 წუთის განმავლობაში მცირე მოცულობის ქართული ტექსტი ლამაზად უნდა გადაეწერათ.
ნამუშევრები შეაფასა კომისიამ, რომლის შემადგენლობაშიც იყვნენ: მუნიციპალიტეტის მერიის კულტურის, სპორტის, განათლების, ძეგლთა დაცვისა და ახალგაზრდულ საქმეთა სამსახურის უფროსის მოვალეობის შემსრულებელი ოლიკო მელიქიძე, სამსახურის თანამშრომლები, მომავლის სახლის დირექტორი სატენიკ მაიტესიანი და საქართველოს სოფლის მეურნეობის სამინისტროს ახალქალაქის საინფორმაციო-საკონსულტაციო ცენტრის სპეციალისტი რამაზ გოგოლაძე.
კონკურსის შედეგების მიხედვით:
პირველი ადგილი დაიკავა სოფელ ჩუნჩხის მოსწავლემ, ხატია გელიძემ;
მეორე ადგილი — სოფელ ზაკის მოსწავლემ, წაღიკ ოგანესიანმა;
მესამე ადგილი — ახალქალაქის ქართული სკოლის მოსწავლემ, ნინო ინასარიძემ.
გამარჯვებულები დაჯილდოვდნენ მედლებითა და სამახსოვრო საჩუქრებით.
