3 ნოემბერს, ახალქალაქის მუნიციპალიტეტის მერიის ადმინისტრაციული შენობის სააქტო დარბაზში მოქალაქეებმა „სამოქალაქო ბიუჯეტირება 2023“-ის ფარგლებში წარმოდგენილი იდეებიდან პრიორიტეტული პროექტის შერჩევის კენჭი იყარეს. არჩევანი 59-მა მოქალაქემ გააკეთა.
ის, რომ ახალქალაქის მოსახლეობა არ არის მოქალაქეობრივად აქტიური, კიდევ ერთხელ დადასტურდა, როდესაც ახალქალაქის მერიაში „საზოგადოების გაძლიერება სოციალურ-ეკონომიკურ და პოლიტიკურ ცხოვრებაში თანაბარი და სრული მონაწილეობისთვის“ პროექტის ფარგლებში განსახორციელებლად წარდგენილი პროექტების არჩევნები ჩატარდა.
მოქალაქეთა უმეტესობა, ვინც ირჩევდა, ახალქალაქის მუნიციპალიტეტის მერიის და საკრებულოს თანამშრომლები იყვნენ.
ახალქალაქის მერის მოადგილე მკრტიჩ მღდესიანმა განმარტა, თუ როგორ უნდა გაეკეთებინათ დამსწრეებს არჩევანი. წინასწარ დაბეჭდილ ბიულეტენზე, სადაც სომხურად და ქართულად ეწერა „საათი“ და „ბილბორდი“, ხოლო ცალკე ფურცელზე ამომრჩევლები აწერდნენ სახელს და გვარს, რათა ბოლოს შეედარებინათ ამომრჩეველთა რაოდენობა და ბიულეტენები. ამომრჩევლებმა ბიულეტენი სპეციალურ საარჩევნო ყუთში ჩატარეს, რომელიც ადგილზე დალუქეს.
ხმების დათვლისას მონაწილეობის მსურველი 5 პირი საარჩევნო კომისიაში წინასწარ აირჩიეს.
საბოლოოდ ხმა მისცა 59-მა ადამიანმა, საიდანაც 44-მა ხმა „ახალქალაქის განვითარების ინტერაქტიულ ბილბორდს“, ხოლო 10-მა „საათს“ მისცა ხმა. 5 ბიულეტენი ბათილად ჩაითვალა.
შეგახსენებთ, რომ ქალაქელების მიერ წარმოდგენილი 4 პროექტიდან კენჭისყრაზე არჩეულ იქნა ორი – „ინტერაქტიული ბილბორდი ახალქალაქის განვითარებისთვის“ და „საათი“. როგორც მერიაში აცხადებენ, აღნიშნული პროექტები ფინანსური, სამართლებრივი და ტექნიკური თვალსაზრისით საჭირო კრიტერიუმებს აკმაყოფილებს.
როგორც მერიაში აცხადებენ, არჩევნებისთვის სწორედ ეს დღე შეირჩა, რომ მერიას პროექტი მომავალი წლის ბიუჯეტში შეეტანა მოესწრო, რომელიც ახალქალაქის მუნიციპალიტეტის საკრებულოს 15 ნოემბერს გადაეცემა.
მიმდინარე წლის აგვისტოდან ახალქალაქში „საზოგადოების გაძლიერება სოციალურ-ეკონომიკურ და პოლიტიკურ ცხოვრებაში თანაბარი და სრული მონაწილეობისთვის“ პროექტი განხორციელდა, რომლის ფარგლებშიც რიგით მოქალაქეებს შესაძლებლობა მიეცათ მონაწილეობა მიეღოთ მუნიციპალური ბიუჯეტირების პროცესში.
პროექტის მიხედვით, ქალაქ ახალქალაქში რეგისტრირებულ და/ან ფაქტიურად მცხოვრებ საქართველოს ყველა მოქალაქეს შეეძლო შეეთავაზებინა იდეა, რომელიც მიზნად ისახავდა მუნიციპალიტეტის ზოგადი გაუმჯობესების განვითარებას. ინიციატივების ბიუჯეტი არ უნდა ყოფილიყო 30 000 ლარზე მეტი.
Jnews-ი თანმიმდევრულად აკვირდებოდა პროექტის განხორციელების პროცესს. აღვნიშნავთ, რომ ინიციატივის მიზანია არა იმდენად პროექტების განხორციელება, რამდენადაც ადგილობრივ ხელისუფლებასა და მოსახლეობას შორის კომუნიკაციის დამყარება და სამოქალაქო მონაწილეობა. თუმცა, ასეთი კომუნიკაცია ჯერ არ მომხდარა პროექტის არცერთ ეტაპზე. პროექტის შესახებ ახალქალაქის ვებგვერდზე და ადგილობრივი თვითმმართველობების სოციალურ ქსელებში თავიდანვე არ იყო გამოცხადებული, ანუ მოქალაქეებს არ ჰქონდათ ამის გარკვევის შესაძლებლობა. გარდა ამისა, HEKS EPER-ისა და სამოქალაქო საზოგადოების ფორმირების მხარდაჭერის ცენტრის (SCCSF) წარმომადგენლებთან პოტენციური იდეების საჯარო განხილვისას, შეხვედრის შესახებ ინფორმაცია ასევე არ გავრცელებულა მოსახლეობაში, ამიტომ მას ძირითადად ადგილობრივი ხელისუფლების წარმომადგენლები ესწრებოდნენ.
