მორიგი თავდასხმა ყირიმის ხიდზე: მატარებლების მოძრაობა შეჩერებულია

მორიგი თავდასხმა ყირიმის ხიდზე: მატარებლების მოძრაობა შეჩერებულია

2026 წლის 17 ნოემბერს ქერჩის სრუტეზე მდებარე ყირიმის ხიდი უკრაინის მორიგი თავდასხმის შედეგად მძიმედ დაზიანდა. გავრცელებული ვიდეოკადრებისა და ფოტოების მიხედვით, საავტომობილო ნაწილის ერთ-ერთი დიდი ლითონის თაღი და გზის მონაკვეთი ზღვაში ჩავარდა. რუსეთის ხელისუფლებამ ხიდზე როგორც საავტომობილო, ისე სარკინიგზო მიმოსვლა შეაჩერა.

ეს თავდასხმა განსაკუთრებით მნიშვნელოვანია იმით, რომ ყირიმის ხიდი რუსეთის მიერ 2014 წელს ანექსირებული ყირიმის ნახევარკუნძულის რუსეთის ტერიტორიასთან დამაკავშირებელი უმნიშვნელოვანესი სახმელეთო დერეფანია, რომელსაც მოსკოვი სამხედრო მომარაგებისთვისაც იყენებდა.
ხიდი წლების განმავლობაში ვლადიმირ პუტინის ერთ-ერთ ყველაზე მასშტაბურ ინფრასტრუქტურულ პროექტად და ყირიმზე რუსეთის კონტროლის სიმბოლოდ მიიჩნეოდა. მისი დაზიანება კი ერთდროულად რამდენიმე პრობლემას ქმნის: ართულებს რუსეთის სამხედრო ლოჯისტიკას, ზრდის ყირიმის მომარაგების ხარჯებს და აჩვენებს, რომ მოსკოვს საკუთარი ერთ-ერთი ყველაზე დაცული სტრატეგიული ობიექტის უსაფრთხოების უზრუნველყოფა უჭირს.

მნიშვნელოვანია, რომ 17 ნოემბრის ჩამოშლას წინ უძღოდა 16 ნოემბრის თავდასხმაც, რომლის შედეგადაც ხიდის კონსტრუქციაზე დაზიანება დაფიქსირდა. შესაბამისად, საუბარია ზედიზედ განხორციელებულ დარტყმებზე და არა ერთ იზოლირებულ ინციდენტზე.

უკრაინის შინაგან საქმეთა მინისტრის მრჩევლის, ანტონ გერაშჩენკოს განცხადებით, თავდასხმისთვის უკრაინული ფრთოსანი რაკეტა FP-5 „ფლამინგო“ გამოიყენეს. რუსეთის ხელისუფლებამ თავდასხმა და ხიდზე მოძრაობის შეზღუდვა დაადასტურა, თუმცა მისი ჩამონგრევის შესახებ ოფიციალური ინფორმაცია ჯერჯერობით არ გაუვრცელებია.

როგორც გამოცემა „Агентство“ აღნიშნავს, რუსეთის ფედერალურმა ტელეარხებმა დილის საინფორმაციო გამოშვებებში ყირიმის ხიდზე თავდასხმის შესახებ არ ისაუბრეს. სამაგიეროდ, მათ გააშუქეს კიევის რამდენიმე ხიდსა და უკრაინის სხვა რეგიონებზე განხორციელებული დარტყმები.

თეგები: უკრაინა
გაზიარება: Facebook Telegram

იხილეთ ასევე