ახალქალაქის მუნიციპალიტეტმა ადგილობრივი ბიუჯეტიდან 3 600 ლარი გამოყო საგანმანათლებლო ცენტრ „ვექტორისთვის“, რათა უზრუნველყოს ახალქალაქის მუნიციპალიტეტის მოსწავლეთა მონაწილეობა „ზარზმის“ მათემატიკურ ოლიმპიადაში.
თანხა გამოყოფილია კულტურის სამსახურის განცხადების საფუძველზე.
Jnews-მა ესაუბრა მუნიციპალიტეტის მერიის კულტურის, სპორტის, განათლების, ძეგლთა დაცვისა და ახალგაზრდობის საქმეთა სამსახურის უფროსის მოვალეობის შემსრულებელს, ოლიკო მელიქიძეს, რათა გაერკვია, თუ რამდენი მოსწავლე მიიღებს მონაწილეობას ოლიმპიადაში ახალქალაქიდან და რომელი სკოლებიდან.
„ახალქალაქის მუნიციპალიტეტიდან „ზარზმის“ ოლიმპიადაში მონაწილეობას მიიღებს ორი მოსწავლე. ისინი ახალქალაქის №3 სკოლის მოსწავლეები არიან. ოლიმპიადა ტარდება ქართულ ენაზე“, – აღნიშნა ოლიკო მელიქიძემ.
Jnews-მა დაუკავშირდა ახალქალაქის სხვა სკოლების დირექტორებს იმის დასადგენად, იცოდნენ თუ არა ახალქალაქის სკოლებმა „ზარზმის“ ოლიმპიადის შესახებ და შეიძლებოდა თუ არა ბავშვების არმონაწილეობის ერთ-ერთი მიზეზი ქართული ენის არასაკმარისი ცოდნა ყოფილიყო. დირექტორებთან საუბრის შედეგად აღმოჩნდა, რომ მათ არ იცოდნენ ამ ოლიმპიადის შესახებ, შესაბამისად, მოსწავლეთა არმონაწილეობის მიზეზი ინფორმაციის უქონლობაა.
„ჩვენს მოსწავლეებს «ზარზმის» ოლიმპიადის შესახებ რომ სცოდნოდათ, ისინი აუცილებლად მიიღებდნენ მონაწილეობას, რადგან ოლიმპიადის ქართულ ენაზე ჩატარება ჩვენი ბავშვებისთვის დაბრკოლება ვერ გახდება. ვფიქრობ, მომავალ წელს უკვე გვეყოლება ამ ოლიმპიადაში მონაწილე მოსწავლეები“, — განაცხადა Jnews-თან საუბრისას №4 საჯარო სკოლის მათემატიკის ერთ-ერთმა პედაგოგმა.
„ზარზმის“ მათემატიკური ოლიმპიადა ზარზმის აკადემიის ინიციატივით ორგანიზდება. აკადემიის საქმიანობა სათავეს 2007 წლიდან იღებს, სოფელ ზარზმის სკოლაში მათემატიკის გაღრმავებული სწავლების ინიციატივით. ზარზმის აკადემია არა მხოლოდ ოლიმპიადების ორგანიზებით არის დაკავებული, არამედ მათემატიკური ნიჭით დაჯილდოებული ბავშვების საგანმანათლებლო მხარდაჭერითაც. აკადემიის საქმიანობის შედეგად, ახალციხეში ასევე შეიქმნა მათემატიკური მომზადების ცენტრი „ვექტორი“.
2014 წლიდან აკადემიის ორგანიზებით ტარდება მათემატიკური ოლიმპიადები რეგიონულ და სრულიად საქართველოს მასშტაბით. ორგანიზატორების მიერ გამოქვეყნებული მონაცემებით, ოლიმპიადებში 4 000-ზე მეტი მოსწავლე მონაწილეობს.
ოლიმპიადის ჩატარების ფორმატი წლების განმავლობაში იცვლებოდა. კერძოდ, 2024 წლის სრულიად საქართველოს კონკურსი სამ ეტაპად ჩატარდა: ონლაინ, დასწრებული და ფინალური. იმ წელს კონკურსში მონაწილეობის შესაძლებლობა ძირითადად VIII-IX კლასების მოსწავლეებს ჰქონდათ, ასევე VII კლასელებსაც.
დასწრებული ეტაპი საქართველოს რვა ქალაქში ჩატარდა, მათ შორის ახალციხეშიც.
