საქართველოს საჯარო რეესტრმა ახლად შექმნილი პოლიტიკური პარტიის, „ჯერ საქართველო“ (Грузия прежде всего), სარეგისტრაციო განაცხადი უარყო. სააგენტომ განაცხადა, რომ პარტიამ, რომელიც „ქართული ოცნების“ დამფუძნებლის, ბიძინა ივანიშვილის ყოფილმა ადვოკატმა ვიქტორ ყიფიანმა დააფუძნა, დოკუმენტაციაში არსებული „ხარვეზები“ არ გამოსწორა.
პარტია ოფიციალურად ივნისის ბოლოს დაფუძნდა, რასთან დაკავშირებითაც ყიფიანმა განაცხადა, რომ ის „ცვლილებებზე ორიენტირებას“ ისახავდა მიზნად.
საჯაროდ ხელმისაწვდომი დოკუმენტების თანახმად, ყიფიანმა პარტიის რეგისტრაციაზე განაცხადი თავდაპირველად 2 ივლისს შეიტანა, თუმცა საჯარო რეესტრმა განაცხადი ხარვეზების მითითებით უარყო. სააგენტომ განაცხადში რვა პრობლემა დაასახელა, მათ შორის სავარაუდო დარღვევები პარტიულ სიასა და წესდებაში.
ყიფიანმა დამატებითი დოკუმენტები 3 და 7 აგვისტოს წარადგინა. მიუხედავად ამისა, აგვისტოს შუა რიცხვებში განაცხადი საბოლოოდ განუხილველად იქნა უარყოფილი; საჯარო რეესტრმა განაცხადა, რომ ხარვეზების უმეტესობა არ აღმოფხვრილა.
პარტიამ აღნიშნული გადაწყვეტილების გასაჩივრების პირობა დადო.
„ახლა 30 დღე გვაქვს, რომ რეაგირება მოვახდინოთ და მოვითხოვოთ დეტალები იმის შესახებ, თუ რატომ მიიჩნია მარეგულირებელმა მოუგვარებლად ის საკითხები, რომლებიც ჩვენ ყოველმხრივ განვიხილეთ“, – განუცხადა „ჯერ საქართველოს“ წევრმა ვასილ ივანოვ-ჩიქოვანმა ტელეკომპანია „TV პირველს“.
„თუ მარეგულირებელი ჩვენს პასუხს კვლავ არ მიიჩნევს კანონიერად, ჩვენ ასევე შეგვიძლია საქმე სასამართლოს გადავცეთ“, – დასძინა მან.
ყიფიანი წარსულში ივანიშვილის ადვოკატი იყო. მისი და მმართველი პარტიის გზები საჯაროდ 2023 წლის გაზაფხულზე გაიყო, როდესაც „ქართულმა ოცნებამ“ პირველად სცადა — მაშინ წარუმატებლად — უცხოური აგენტების შესახებ დავების გამომწვევი კანონის მიღება, რომელსაც კრიტიკოსები არაერთხელ ადარებდნენ რუსეთის ხელისუფლების მიერ განსხვავებული აზრის ჩასახშობად მიღებულ კანონმდებლობას.
იმ დროს ყიფიანმა ეჭვქვეშ დააყენა ასეთი კანონმდებლობის საჭიროება და იკითხა, იყო თუ არა საჭირო ასეთი პროტესტის გამოწვევა მისი ინიცირებით. ამას მოჰყვა კრიტიკა მმართველი პარტიის მხრიდან, რომლის თავმჯდომარე და ამჟამინდელი პრემიერ-მინისტრი ირაკლი კობახიძე ამტკიცებდა, რომ თავად ყიფიანიც მოხვდებოდა ამ სადავო კანონის მოქმედების ქვეშ, რაც, მისი აზრით, ხსნიდა ამ უკანასკნელის რეაქციას.
კობახიძემ ასევე განაცხადა, რომ ყიფიანი ივანიშვილის იურისტთა გუნდიდან კანონის კრიტიკამდე ჯერ კიდევ ადრე, სავარაუდოდ თავად ივანიშვილის გადაწყვეტილებით გარიცხეს. მას არ დაუკონკრეტებია, რა მოხდა მათ შორის, თუმცა აღნიშნა, რომ მიზეზი „ბევრად სერიოზული“ იყო, ვიდრე კანონმდებლობასთან დაკავშირებული უთანხმოება.
2024 წლის აგვისტოში, ოქტომბრის სადავო საპარლამენტო არჩევნებამდე ორი თვით ადრე ცნობილი გახდა, რომ ყიფიანი და მისი ანალიტიკური ცენტრი GeoCase ოპოზიციურ კოალიცია „ძლიერ საქართველოსთან“ ერთად იმუშავებდნენ მისი საარჩევნო პროგრამის შემუშავებაზე.
ავტორი – მიხეილ გვაძაბია
სტატია ქვეყნდება OC Media-სთან კონტენტის გაცვლის პარტნიორობის ფარგლებში. დედანის წაკითხვა ინგლისურ ენაზე შეგიძლიათ აქ.
