შინაგანი საქმეთა სამინისტროს 2026 წლის ბოლო სტატისტიკური მონაცემებით, რომელიც ჯერჯერობით მხოლოდ იანვარ-მარტის პერიოდს მოიცავს, მართვის მოწმობიდან ჯარიმის ქულები 165 091 ადამიანს ჩამოაკლდა, საიდანაც ქულები სრულად მხოლოდ 31 პირს ამოეწურა. ამავე მონაცემებით, 1 132 653-მა მძღოლმა დარიცხული 100-ვე ჯარიმის ქულის შენარჩუნება შეძლო.
გამოცემა „BusinessPressNews“-ს მოყავს იმ მძღოლების რაოდენობა რეგიონების მიხედვით, რომლებმაც მართვის მოწმობაზე 100-ვე ჯარიმის ქულის შენარჩუნება შეძლეს (მონაცემები მოიცავს 2026 წლის პირველ კვარტალს):
თბილისი – 379 320 მძღოლი
იმერეთი – 169 019 მძღოლი
ქვემო ქართლი – 116 454 მძღოლი
აჭარა – 100 340 მძღოლი
კახეთი – 93 832 მძღოლი
სამეგრელო-ზემო სვანეთი – 86 451 მძღოლი
შიდა ქართლი – 77 601 მძღოლი
სამცხე-ჯავახეთი – 38 131 მძღოლი
გურია – 30 022 მძღოლი
მცხეთა-მთიანეთი – 28 554 მძღოლი
რაჭა-ლეჩხუმი და ქვემო სვანეთი – 9 269 მძღოლი
აფხაზეთი – 3 660 მძღოლი
ცნობისთვის, საქართველოში ყოველი წლის 1 იანვარს მართვის მოწმობას 100 ქულა ენიჭება. მძღოლს ქულების გარკვეული რაოდენობა პოლიციის მიერ დაფიქსირებული სხვადასხვა დარღვევისთვის აკლდება. მაგალითად, ქულები აკლდება სიჩქარის გადაჭარბების, წინა სავარძელზე მყოფი მგზავრის მიერ უსაფრთხოების ღვედის შეუკვრელობის, საჭესთან მობილურ ტელეფონზე ლაპარაკისა და სხვა დარღვევებისთვის.
ქულების განულების შემთხვევაში, მძღოლი სატრანსპორტო საშუალების მართვის უფლებას კარგავს. მართვის უფლების აღსადგენად აუცილებელია თეორიული და პრაქტიკული გამოცდების ხელახლა ჩაბარება.
აღსანიშნავია, რომ საქართველოს მთავრობამ დაამტკიცა საგზაო მოძრაობის უსაფრთხოების 2026-2030 წლების ეროვნული სტრატეგია და 2026-2027 წლების სამოქმედო გეგმა, რომელთა ერთ-ერთი მთავარი მიმართულება გზებზე სიჩქარის შემცირებაა. სტრატეგიის ერთ-ერთი პუნქტის შესაბამისად, მთავრობა გეგმავს შემოიღოს სისტემა, რომლითაც მძღოლებს მართვის მოწმობიდან ქულები ვიდეოკამერების მიერ დაფიქსირებული სიჩქარის გადაჭარბებისთვისაც ჩამოაკლდებათ.
