რუსთავში, სადაც საქართველოს ყველაზე დიდი ავტობაზრობა მდებარეობს, პოლიციამ ავტოიმპორტიორი დააკავა, რომელსაც ბრალად მოქალაქეების კუთვნილი თანხების თაღლითურად მითვისება ედება.
გამოძიებით დადგინდა, რომ ბრალდებული სხვადასხვა დროს მოქალაქეებს იაპონიიდან ავტომობილების იმპორტს ჰპირდებოდა, რისთვისაც მათგან 4 900 დოლარი და 42 110 ლარი აიღო. თუმცა, მან ნაკისრი ვალდებულებები არ შეასრულა და თანხა მიითვისა, — აცხადებენ შინაგან საქმეთა სამინისტროში.
მამაკაცი დაკავებულია.
გამოძიება საქართველოს სისხლის სამართლის კოდექსის „დიდი ოდენობით ჩადენილი თაღლითობის“ მუხლით მიმდინარეობს. ბრალდებულს 9 წლამდე ვადით თავისუფლების აღკვეთა ემუქრება.
