სასოფლო-სამეურნეო სეზონის გვიან დაწყებისა და არასტაბილური ამინდის გამო, ახალქალაქის მუნიციპალიტეტის ფერმერები მოსავლის დაკარგვის რისკის წინაშე კვლავ აღმოჩნდნენ. აგროდაზღვევის სახელმწიფო სუბსიდირებისა და რამდენიმე სადაზღვევო კომპანიის მუშაობის მიუხედავად, მოსავლის დაზღვევის პროგრამა ადგილობრივ ფერმერებში კვლავ არაპოპულარული რჩება.
ბევრ სოფელში კარტოფილის დარგვა ჯერ კიდევ არ დაუსრულებიათ. ასეთ არაპროგნოზირებად ამინდში, წესით, აგროდაზღვევა ფერმერებისთვის ერთ-ერთი ყველაზე მოთხოვნადი პროგრამა უნდა იყოს. თუმცა, სასოფლო-სამეურნეო მოსავლის დაზღვევის პროგრამა, რომელსაც სახელმწიფო აგროდაზღვევის ფარგლებში ასუბსიდირებს, ახალქალაქში არაპოპულარული რჩება.
ფერმერები სხვადასხვა მიზეზს ასახელებენ: ზოგი არ ენდობა სადაზღვევო კომპანიებს, ზოგი უკმაყოფილოა წარმომადგენლების მუშაობის ოპერატიულობით, ზოგს კი დაზღვევის პირობები არ აკმაყოფილებს. არიან ისეთებიც, ვინც ვერ აზღვევს თავის მიწებს, რადგან ეს მხოლოდ მიწის ნაკვეთის სახელმწიფო რეგისტრაციის არსებობის შემთხვევაშია შესაძლებელი, მათ კი რეგისტრაცია ჯერ არ აქვთ.
სადაზღვევო კომპანიები, თავის მხრივ, არცთუ ისე აქტიურობენ ახალქალაქის მუნიციპალიტეტში და პრაქტიკულად არ ატარებენ საინფორმაციო კამპანიებს. ყველა კომპანიას არ ჰყავს წარმომადგენელი ახალქალაქში, რაც ასევე ახდენს გავლენას ფერმერების უარყოფით განწყობაზე მოსავლის დაზღვევის მიმართ. 2015 წლიდან ახალქალაქის მუნიციპალიტეტში მუდმივი ოფისი მხოლოდ კომპანია „ალდაგს“ აქვს.
წელს კომპანიის წარმომადგენელმა ახალქალაქსა და ნინოწმინდაში, ლევან ვახტანგიშვილმა განაცხადა, რომ კომპანია აგრძელებს მუშაობას ჯავახეთში და აქვს თავისი ოფისი.
„ჩვენ, რა თქმა უნდა, წელსაც ვაზღვევდით, თუმცა ჯერ ყველას არ დაუსრულებია კარტოფილის დარგვა. ამის შემდეგ ფერმერები უკვე მოგვმართავენ დაზღვევისთვის“, — თქვა ლევან ვახტანგიშვილმა.
მისი თქმით, კარტოფილისა და მარცვლოვანი კულტურების დაზღვევის რაოდენობა დაახლოებით ისეთივეა, როგორც ყოველ წელს, თუმცა კომპანიაში არ აკონკრეტებენ, თუ რა ციფრებზეა საუბარი.
კომპანია „ნიუ ვიჟენ დაზღვევა“ ახალქალაქში 2022 წლიდან ოპერირებს. იყო პერიოდი, როდესაც კომპანიამ ახალქალაქში ოფისი გახსნა, თუმცა ზოგ წლებში ოფისის გარეშე მუშაობდა. წელს კომპანიამ ოფისი კვლავ გახსნა.
კომპანია „ნიუ ვიჟენ დაზღვევის“ წარმომადგენელმა, სურენ მურადიანმა განაცხადა, რომ ისინი უკვე ერთი თვეა მუშაობენ მუნიციპალიტეტში და ამ დროის განმავლობაში დაახლოებით 70–80 ჰექტარი კარტოფილის ნაკვეთი დააზღვიეს.
„უკვე ერთი თვეა ვმუშაობთ, ვაწარმოებთ აგიტაციას და დაახლოებით 70–80 ჰექტარი კარტოფილი უკვე დავაზღვიეთ. თუ ფერმერმა თანხა ბანკიდან კრედიტით აიღო, კომპანია საბანკო პროცენტსაც ფარავს“, — თქვა სურენ მურადიანმა.
აღსანიშნავია, რომ სადაზღვევო კომპანიები უფრო მეტად არიან დაინტერესებულნი კარტოფილის დაზღვევით, ვიდრე მარცვლოვანი კულტურების, ვინაიდან მარცვლეული უფრო მოწყვლადია არახელსაყრელი ამინდის პირობების მიმართ.
ყოველ წელს პროგრამას სხვადასხვა სადაზღვევო კომპანია ახორციელებს. სხვადასხვა წლებში მათი რაოდენობა რვამდე აღწევდა. წელს აგროდაზღვევის ბაზარზე ოთხი კომპანია მუშაობს: „ალდაგი“, „ნიუ ვიჟენ დაზღვევა“, „თიბისი დაზღვევა“ და „ალფა“.
ჩვენი ინფორმაციით, კომპანია „ალფა“ ონლაინ რეჟიმში მუშაობს, ხოლო „თიბისი დაზღვევა“ თიბისი ბანკის კლიენტების დაზღვევას ახორციელებს.
მოსავლის დაზღვევა სახელმწიფო პროგრამაა. სადაზღვევო პრემიის 70%-ს სახელმწიფო იხდის, ხოლო 30%-ს — მიწის ნაკვეთის მფლობელი. ახალქალაქის მუნიციპალიტეტში ყველა სადაზღვევო კომპანია მოსავალს სეტყვისგან, წყალდიდობისგან, შემოდგომის ყინვებისა და ქარიშხლისგან აზღვევს.
საერთო სადაზღვევო პრემია 1 ჰექტარ კარტოფილის ნაკვეთზე შეადგენს 1275 ლარს, საიდანაც:
— ფერმერი იხდის 382,5 ლარს;
— სახელმწიფო — 892,5 ლარს.
დაზღვევის ნორმატივების მიხედვით, 100-პროცენტიანი ზარალის შემთხვევაში, ფერმერს შეუძლია მიიღოს 15 000 ლარამდე კომპენსაცია 1 ჰექტარ კარტოფილის ნაკვეთზე. ეს თანხა გათვლილია 1 კილოგრამი კარტოფილის ღირებულებიდან — 0,60 თეთრი, ჰექტარზე 25 000 კილოგრამის მოსავლიანობის პირობებში.
ხორბლის დაზღვევის თანხა შეადგენს 1500 ლარს. ქერის სადაზღვევო თანხა არის 1260 ლარი, საიდანაც 70%-ს სახელმწიფო ფარავს, ხოლო 30%-ს — მიწის ნაკვეთის მფლობელი.
ჩვენი დაკვირვებით, ახალქალაქის მუნიციპალიტეტის ფერმერებში აგროდაზღვევისადმი ინტერესი უმნიშვნელოდ იზრდება, თუმცა პროგრამა კვლავ არაპოპულარული რჩება.
