JNEWS-მა მკითხველთა თხოვნით დააზუსტა საკითხი იმის შესახებ, თუ რა დოკუმენტები უნდა წარადგინონ ბავშვებმა და მოზარდებმა — საქართველოს მოქალაქეებმა — საზღვრის გადაკვეთისას. მიმართვის მიზეზი გახდა შემთხვევები, როდესაც არასრულწლოვნები საბაჟოდან დოკუმენტაციის არასრულყოფილად მომზადების გამო დააბრუნეს. შვებულებების სეზონის, სასკოლო ექსკურსიებისა და ბანაკების დაწყებასთან ერთად, ეს საკითხი განსაკუთრებით აქტუალურია.
საქართველოს არასრულწლოვან მოქალაქეებს სომხეთსა და თურქეთში შესვლა შეუძლიათ როგორც საზღვარგარეთის პასპორტით, ისე პირადობის მოწმობით (ID ბარათით). თუმცა, თუ არასრულწლოვანი საზღვარს საზღვარგარეთის პასპორტით კვეთს, საკმარისია ერთ-ერთი მშობლის ნოტარიულად დამოწმებული თანხმობა (თუ მშობლებს შორის იურიდიული დავა არ ფიქსირდება). იმ შემთხვევაში კი, როდესაც არასრულწლოვანი საზღვარს პირადობის მოწმობით კვეთს, აუცილებელია ორივე მშობლის ნოტარიულად გაფორმებული თანხმობა (ერთ დოკუმენტში ან ცალ-ცალკე). ეს გამოწვეულია იმით, რომ პირადობის მოწმობა შეიძლება გაიცეს ერთი მშობლის თანხმობით, მაშინ როცა პასპორტი მხოლოდ ორივეს თანხმობის საფუძველზე გაიცემა.
როგორც საპატრულო პოლიციაში განმარტეს, 16 და 17 წლის მოზარდებს საზღვრის გადასაკვეთად მხოლოდ მშობლების ნოტარიულად დამოწმებული თანხმობა ესაჭიროებათ, ხოლო 16 წლამდე ასაკის ბავშვებისთვის აუცილებელია როგორც თანხმობა და მინდობილი პირი, ისე დაბადების მოწმობა.
აღნიშნული წესები მოქმედებს საქართველოს საზღვრის გადაკვეთისას სომხეთსა და თურქეთთან. საქართველო-რუსეთის საზღვრის პასპორტით გადაკვეთისას კი აუცილებელია ორივე მშობლის თანხმობა (ეს რუსეთის კანონმდებლობის მოთხოვნაა).
