დღეს ჩვენ პატივს მივაგებთ 1915 წლის სომეხთა გენოციდის, დიდი ეღერნის მსხვერპლთა ხსოვნას და პატივს მივაგებთ ჩვენს იმ თანამემამულეებს, რომლებიც სომხობის გამო ოსმალეთის იმპერიაში დარბევების, დეპორტაციისა და შიმშილის მსხვერპლნი გახდნენ, — აღნიშნა პრემიერ-მინისტრმა ნიკოლ ფაშინიანმა თავის გზავნილში.
„დიდი ეღერნი ჩვენს თავს გადახდილი უდიდესი ტრაგედიაა, რომელსაც ჩვენი ხალხი უკვე 111 წელია განიცდის“, — განაცხადა ფაშინიანმა და აღნიშნა, რომ არ შეიძლება დავუშვათ, რომ დიდი ეღერნი საერთაშორისო მოთამაშეების ერთმანეთის წინააღმდეგ ბრძოლის ინსტრუმენტად იქცეს.
„დიდი ეღერნი სომეხი ხალხის საერთაშორისო ინტრიგებში ჩათრევის პრაქტიკის შედეგი იყო“, — თქვა ფაშინიანმა.
„ჩვენ გვაქვს სახელმწიფო და მშვიდობა. სახელმწიფო და მშვიდობაა იმის გარანტია, რომ სომეხთა გენოციდი კვლავ აღარ განმეორდეს. ამ ისტორიული მიზნის განსახორციელებლად ჩვენთვის აუცილებელია შევწყვიტოთ სამშობლოს ძიება ჩვენი სახელმწიფოს — სომხეთის რესპუბლიკის საერთაშორისოდ აღიარებული 29,743 კვადრატული კილომეტრის ფართობის მიღმა. ეს ტერიტორია არ არის მცირე სომეხი ხალხის წინსვლისთვის, განვითარებისა და კეთილდღეობისთვის“, — განაცხადა პრემიერ-მინისტრმა სომეხთა გენოციდის 111-ე წლისთავთან დაკავშირებით გამოქვეყნებულ გზავნილში.
დღეს ერევანში ათასობით ადამიანი სტუმრობს წიწერნაკაბერდის მემორიალურ კომპლექსს და პატივს მიაგებს მე-20 საუკუნის დასაწყისში გენოციდის მსხვერპლად ქცეული მილიონ-ნახევარზე მეტი სომეხის ხსოვნას.
ფოტო: არქივიდან.
