---

Visual Capitalist-ის მიერ მომზადებული მასალების თანახმად, 2000 წლიდან 2025 წლამდე მსოფლიო მოსახლეობა 2 მილიარდზე მეტი ადამიანით გაიზარდა, თუმცა ზრდის ტემპები ქვეყნების მიხედვით მნიშვნელოვნად განსხვავდება.

უკანასკნელი 25 წლის განმავლობაში მოსახლეობის ყველაზე მაღალი პროცენტული ზრდა სპარსეთის ყურის მცირე სახელმწიფოებში დაფიქსირდა, თუმცა გაცილებით მაღალი ზრდის ტემპები იყო ინდოეთში, ნიგერიასა და პაკისტანში.

როგორც Visual Capitalist-ის მონაცემები აჩვენებს, პროცენტული ზრდის ტემპით მცირე ეკონომიკის მქონე ქვეყნები ლიდერობენ. გარდა ამისა, ქვეყნები, სადაც მოსახლეობა ყველაზე მეტად გაიზარდა, ახლა ყველაზე მჭიდროდ დასახლებულთა რიცხვში შედიან.

მაგალითად, 2000 წლიდან ინდოეთში მოსახლეობის მასშტაბური მატება შეინიშნება. კერძოდ, ბოლო 25 წელიწადში ქვეყნის მოსახლეობა 406 მილიონი ადამიანით გაიზარდა (+38%), რაც ინდოეთს თანამედროვე ისტორიაში მოსახლეობის ყველაზე დიდი ნამატის მქონე ქვეყნად აქცევს.

ცნობისთვის, 2023 წელს ინდოეთმა ჩინეთს გადაუსწრო და მსოფლიოს ყველაზე ხალხმრავალი ქვეყანა გახდა. გამოცემა წერს, რომ ინდოეთი უახლოეს მომავალში ამ პოზიციას, სავარაუდოდ, არ დათმობს.

ქვემოთ მოცეულია ის 10 ქვეყანა, რომელთა მოსახლეობაც ბოლო 25 წლის განმავლობაში ყველაზე მეტად გაიზარდა:

• ინდოეთი — 406 მილიონი ადამიანი;
• ჩინეთი — 138 მილიონი ადამიანი;
• ნიგერია — 113 მილიონი ადამიანი;
• პაკისტანი — 105 მილიონი ადამიანი;
• ინდონეზია — 78 მილიონი ადამიანი;
• აშშ — 59 მილიონი ადამიანი;

კონგოს დემოკრატიული რესპუბლიკა — 59 მილიონი ადამიანი;

• ეთიოპია — 50 მილიონი ადამიანი;
• ბანგლადეში — 46 მილიონი ადამიანი;
• ეგვიპტე — 45 მილიონი ადამიანი.
• მოსახლეობის ყველაზე მაღალი პროცენტული ზრდის მქონე ათი ქვეყანა 2000-დან 2025 წლამდე პერიოდში:
• კატარი — 423%;
• არაბთა გაერთიანებული საამიროები — 249%;
• ეკვატორული გვინეა — 166%;
• ნიგერი — 157%;
• ბაჰრეინი — 153%;
• პაპუა-ახალი გვინეა — 149%;
• ანგოლა — 139,7%;
• ქუვეითი — 139,1%;
• ომანი — 129%;
• ჩადი — 126%.

რეიტინგში სულ 25 ქვეყანაა წარმოდგენილი. საქართველო და მეზობელი ქვეყნების უმეტესობა სიაში არ ფიგურირებს. საქართველოს მეზობლებიდან რეიტინგში მხოლოდ თურქეთია მოხვედრილი.

მონაცემების მიხედვით, თურქეთის მოსახლეობა ბოლო 25 წელიწადში 22 მილიონი ადამიანით გაიზარდა, რამაც ქვეყანას Visual Capitalist-ის რეიტინგში 21-ე ადგილი მოუტანა.