ახალქალაქში დილიდან სადღესასწაულო განწყობა იყო. სხვადასხვა სკოლაში პირველი ზარი სხვადასხვა დროს დაირეკა. ბავშვები, მოწესრიგებულად ჩაცმულები, ყვავილებითა და ბუშტებით ხელში, სკოლაში ფეხით მიდიოდნენ. ახალქალაქში 5 სკოლაა: 3 სომხური, ერთი რუსული და ერთი ქართული.
საგანმანათლებლო რესურსების ცენტრის მონაცემებით, ახალქალაქის მუნიციპალიტეტში სკოლის მოსწავლეთა საერთო რაოდენობა 6,789-ს შეადგენს. წელს პირველ კლასში 534 მოსწავლე სწავლობდა. წინასწარი მონაცემებით (მონაცემები შეიძლება შეიცვალოს), სოფელ მოდეგამის სკოლაში პირველკლასელები არ არიან. ხოლო 4 სოფელში (ბურნაშეტი, ტახჩა, მიასნიკიანი და ოკამი (სკოლა 2) თითო პირველკლასელია. რაც შეეხება ახალქალაქის სკოლებს, #1 საჯარო სკოლაში, სადაც 2 კლასი გაიხსნა, 34 პირველკლასელი სწავლობდა, #2 საჯარო სკოლაში 3 პირველ კლასში – 62 პირველკლასელი, #3 საჯარო სკოლაში 19 პირველკლასელი, #4 საჯარო სკოლაში 3 პირველ კლასში – 57 პირველკლასელი და #5 სკოლის პირველ კლასში – 11 მოსწავლე.
