თბილისში მიმდინარე საპროტესტო აქციებმა უკვე 60 დღეს მიაღწია და ახლა ქვეყნის პოლიტიკური და სოციალური დღის წესრიგის მთავარი თემა გახდა. ყოველდღიურად ათასობით მოქალაქე გამოდის ქუჩაში, რათა მათი პროტესტი გააგონონ. არიან დაკავებულები და დაზარალებულები. ორთვიანი უწყვეტი ბრძოლა – რისთვის არის ეს და იძლევა თუ არა შედეგს?
საპროტესტო აქციები მიმდინარეობს თბილისში, ბათუმში, ქუთაისში, ზუგდიდში, გორში, ახალციხესა და სხვა ქალაქებში.
აქციის მონაწილეები განსაკუთრებით ხაზს უსვამენ რეჟიმის პატიმრების გათავისუფლების მოთხოვნას, რომლებიც, მათი თქმით, პოლიტიკური ნიშნით დააკავეს. აქციის მონაწილეები თვლიან, რომ ამ პირების დაკავება არის იმის ნიშანი, რომ ქვეყანაში სისტემატურად იდევნება კრიტიკული აზრი.
ამ თემაზე JNEWS-ს ესაუბრა საქართველოს სტრატეგიული და საერთაშორისო კვლევების ფონდის უფროსი მკვლევარი (რონდელის ფონდი), საქართველოს ყოფილი ელჩი დიდ ბრიტანეთში გიორგი ბადრიძე, რომელმაც აღნიშნა, რომ საპროტესტო აქციების დაწყების ორი მიზეზი იყო: პირველი – არჩევნების გაყალბებით გამოწვეული საზოგადოების მნიშვნელოვანი ნაწილის უკმაყოფილება, მაგრამ მან ახალი ბიძგი მიიღო პრემიერ-მინისტრის არალეგიტიმური ხელისუფლების წარმომადგენლის, ირაკლი კობახიძის 28 ნოემბერს განცხადების შემდეგ, რომლის მიხედვითაც საქართველოს მთავრობა 2028 წლის ბოლომდე უარს ამბობს ევროკავშირთან მოლაპარაკებების დაწყებაზე.
მიუხედავად იმისა, რომ „ქართული ოცნების“ პარტია საპროტესტო ტალღას კოორდინირებულ რევოლუციურ მოძრაობად წარმოაჩენს, ბადრიძე განმარტავს, რომ რეალურად ამ საპროტესტო აქციებს არ ჰყავს არც ერთი ორგანიზატორი და არც კოორდინატორი. აქციის მონაწილეები აგრძელებენ ახალი და სამართლიანი არჩევნების ჩატარების, ასევე პატიმრების გათავისუფლების მოთხოვნას.
ამ სიტუაციამ ყურადღება მიიპყრო არა მარტო საქართველოში, არამედ საერთაშორისო დონეზეც. ჩვენს კითხვაზე, როგორ აფასებს ექსპერტი საქართველოში მიმდინარე საპროტესტო აქციებზე საერთაშორისო მხარდაჭერასა თუ რეაქციას, მან გვიპასუხა.
„ჩვენმა საერთაშორისო პარტნიორებმა ქართველ ხალხს სოლიდარობა გამოუცხადეს, რეალობა ისაა, რომ ავტორიტარული ქვეყნების წარმომადგენლების გარდა, რომელთა ჩამოთვლაც თითებზე შეიძლება, ბევრი ქვეყანა არ ცნობს ივანიშვილის ხელისუფლების ლეგიტიმურობას. საინტერესოა ისიც, რომ ვინც ამ ხელისუფლებას აღიარებს, არც კი ცნობდა საქართველოს მთლიანობას, მაგალითად, რუსეთს, ვენესუელას ან ნიკარაგუას. საერთაშორისო საზოგადოება არ იღებს ამ რეჟიმს და ბევრი სანქციებსაც კი მიმართავს“.
მისი შეფასებით, საერთაშორისო რეაქცია გაცილებით სუსტი იქნებოდა, რომ არ ყოფილიყო ასეთი აქტიური საპროტესტო აქციები მთელი ქვეყნის მასშტაბით და, მისი აზრით, თუ პროტესტი ასეთი მასიური ტემპით გაგრძელდება, სანქციები არ დააყოვნებს.
შეგახსენებთ, რომ თავდასხმები იყო ჟურნალისტებზეც, ასევე “საქართველოსთვის” ოპოზიციური პარტიის ხელმძღვანელზე გიორგი გახარიაზე. წინასწარ პატიმრობაში იმყოფება ასევე ავტორიტეტული მედია „ბათუმელების“ და „ნეტგაზეთის“ დამფუძნებელი-რედაქტორი მზია ამაღლობელი პოლიციელის დარტყმის ბრალდებით.
