ჩვენ ვადასტურებთ 2008 წლის ბუქარესტის სამიტზე მიღებულ გადაწყვეტილებას, რომ საქართველო გახდება ალიანსის წევრი და წევრობის სამოქმედო გეგმა (MAP) არის პროცესის განუყოფელი ნაწილი, – ამის შესახებ ნატო-ს ვილნიუსის სამიტის პირველი დღის შემდე გამოქვეყნებულ კომუნიკეშია აღნიშნული.
როგორც კომუნიკეშია ნათქვამი, ევროატლანტიკური მისწრაფებების წინსვლისთვის საქართველომ უნდა მიაღწიოს პროგრესს რეფორმებში, მათ შორის საკვანძო დემოკრატიულ რეფორმებში და წლიური ეროვნული პროგრამა მაქსიმალურად გამოიყენოს.
„ჩვენ თბილად მივესალმებით პრეზიდენტ ზელენსკის ნატო-უკრაინის საბჭოს საინაუგურაციო სხდომაზე. მოუთმენლად ველოდებით ჩვენს ღირებულ აზრთა გაცვლას ავსტრალიის, იაპონიის, ახალი ზელანდიისა და კორეის რესპუბლიკის სახელმწიფოთა და მთავრობების მეთაურებთან, ასევე ევროპის საბჭოს პრეზიდენტთან და ევროკომისიის პრეზიდენტთან ამ სამიტზე. ჩვენ ასევე მივესალმებით საქართველოსა და მოლდოვის რესპუბლიკის საგარეო საქმეთა მინისტრებთან და ბოსნია-ჰერცეგოვინის საგარეო საქმეთა მინისტრის მოადგილესთან შეხვედრას, რადგან განვაგრძობთ მჭიდრო კონსულტაციებს ნატო-ს მორგებული მხარდაჭერის ღონისძიებების განხორციელებაზე.
შავი ზღვის რეგიონი სტრატეგიული მნიშვნელობისაა ალიანსისთვის. ამას კიდევ უფრო ხაზს უსვამს რუსეთის აგრესიული ომი უკრაინის წინააღმდეგ. ჩვენ ხაზს ვუსვამთ ჩვენს მუდმივ მხარდაჭერას მოკავშირეთა რეგიონული ძალისხმევის მიმართ, რომელიც მიზნად ისახავს უსაფრთხოების, სტაბილურობისა და ნაოსნობის თავისუფლების დაცვას შავი ზღვის რეგიონში, მათ შორის, საჭიროების შემთხვევაში, 1936 წლის მონტრეს კონვენციის მეშვეობით. ჩვენ შემდგომ მონიტორინგს გავუწევთ და შევაფასებთ რეგიონში განვითარებულ მოვლენებს და გავაძლიერებთ მონიტორინგს, განსაკუთრებულ ყურადღებას მივაქცევთ იმ საფრთხეებს, რომლებიც ჩვენს უსაფრთხოებას ემუქრება და საჭიროების შემთხვევაში უფრო მჭიდროდ ვითანამშრომლებთ ჩვენს პარტნიორებთან რეგიონში.
ჩვენ ვადასტურებთ საქართველოს ტერიტორიული მთლიანობისა და სუვერენიტეტისადმი ჩვენს მხარდაჭერას მის საერთაშორისოდ აღიარებულ საზღვრებში. მტკიცედ ვუჭერთ მხარს საქართველოს უფლებას, განსაზღვროს საკუთარი მომავალი და საგარეო პოლიტიკური კურსი გარე ძალების ჩარევის გარეშე. მოვუწოდებთ რუსეთს, გაიყვანოს თავისი ჯარი, რომელიც მან საქართველოში მისი თანხმობის გარეშე განათავსა.
ჩვენ ასევე მოვუწოდებთ რუსეთს, უკან გაიწვიოს საქართველოს რეგიონების, აფხაზეთსა და სამხრეთ ოსეთის აღიარება; შეწყვიტოს ამ რეგიონების მილიტარიზაცია და, საზღვრის დაწესებით, საქართველოსგან მათი იძულებით გამოყოფის მცდელობები;
შეწყვიტოს ადამიანის უფლებების დარღვევა და შეურაცხყოფა, მათ შორის თვითნებური დაკავებები და საქართველოს მოქალაქეების შევიწროება.
ჩვენ ძალიან ვაფასებთ საქართველოს არსებით წვლილს ნატო-ს ოპერაციებში, რაც ადასტურებს მის ერთგულებასა და შესაძლებლობებს, წვლილი შეიტანოს ევროატლანტიკურ უსაფრთხოებაში.
ჩვენ ვრჩებით ერთგულნი, სრულად გამოვიყენოთ ნატო-საქართველოს კომისია და წლიური ეროვნული პროგრამა (ANP) საქართველოსთან პოლიტიკური დიალოგისა და პრაქტიკული თანამშრომლობის გაღრმავებისთვის.
ვადასტურებთ 2008 წლის ბუქარესტის სამიტზე მიღებულ გადაწყვეტილებას, რომ საქართველო გახდება ალიანსის წევრი და წევრობის სამოქმედო გეგმა (MAP) არის პროცესის განუყოფელი ნაწილი; ჩვენ ვადასტურებთ ამ გადაწყვეტილების ყველა დეტალს, ასევე შემდგომ გადაწყვეტილებებს.
მივესალმებით ნატო-საქართველოს გაფართოებული არსებითი პაკეტის განხორციელებაში მიღწეულ პროგრესს, მათ შორის კრიზისების მართვაში, კიბერუსაფრთხოებაში, სამხედრო ინჟინერიასა და უსაფრთხო კომუნიკაციებში, აგრეთვე ახალი ქიმიური, ბიოლოგიური, რადიოლოგიური და ბირთვული (CBRN) თავდაცვის ინიციატივებს და საგანმანათლებლო დაწესებულებებს.
ევროატლანტიკური მისწრაფებების წინსვლისთვის საქართველომ უნდა მიაღწიოს პროგრესს რეფორმებში, მათ შორის საკვანძო დემოკრატიულ რეფორმებში და წლიური ეროვნული პროგრამა მაქსიმალურად გამოიყენოს“, – აღნიშნულია კომუნიკეში.
