ახალქალაქის მუნიციპალიტეტის სოფლებში, კორხსა და თოთხამში, წლების განმავლობაში არსებული წყალმომარაგების პრობლემის მოგვარების სამუშაოები უკვე აქტიურ ფაზაშია. ორივე სოფლისთვის განკუთვნილი ახალი წყალსადენი „აბლარის“ წყალსაცავიდან შენდება.
ახალქალაქის მუნიციპალიტეტმა ახალი წყალსადენის მშენებლობის სამუშაოებზე ტენდერი 16 აპრილს გამოაცხადა. პროექტის ღირებულება 608 137 ლარს შეადგენს. ამჟამად სამშენებლო სამუშაოები მიმდინარეობს, ადგილობრივები კი ელოდებიან, რომ ახალი სისტემა საბოლოოდ შეამსუბუქებს წყლის დეფიციტს, რომელიც განსაკუთრებით ზაფხულის თვეებში იქმნება.
კორხსა და თოთხამში წყალმომარაგების პრობლემა უმეტესად წელიწადის ცხელ პერიოდში მწვავდება. მოსახლეობისთვის განსაკუთრებით მძიმე ზაფხულის სეზონია — სექტემბრის შუა რიცხვებამდე, როდესაც წყალზე მოთხოვნა იზრდება, არსებული სისტემა კი მცხოვრებთა საჭიროებების დაკმაყოფილებას ყოველთვის ვერ ახერხებს.
კორხის თემში მერის წარმომადგენლის, კარლიკ განდილიანის განცხადებით, წყალსადენის მშენებლობა ამჟამად აქტიურ ფაზაშია.
„სამუშაოები აქტიურ ეტაპზეა. ვიმედოვნებთ, პროცესი უპრობლემოდ დასრულდება და ორივე სოფელი უზრუნველყოფილი იქნება უწყვეტი წყალმომარაგებით. ზაფხულის თვეებში, სექტემბრის შუა რიცხვებამდე, ჩვენს სოფლებში წყლის პრობლემა ძალზე მწვავედ დგას. თუმცა სოფელ თოთხამში ვითარება კიდევ უფრო მძიმეა, რადგან მოსახლეობის თითქმის ნახევარს წყალი საერთოდ არ მიეწოდება. იმედი გვაქვს, რომ ახალი წყალსადენი ამ პრობლემას საბოლოოდ მოაგვარებს.“
ახალი წყალსადენის მშენებლობის დასრულების ვადების შესახებ დასმულ შეკითხვაზე კორხის თემში მერის წარმომადგენელმა უპასუხა:
„კონკრეტულ ვადებს ჯერ ვერ დავასახელებ, ამჟამად სამუშაოები ჩვეულ რეჟიმში მიმდინარეობს.“
ადგილობრივი მცხოვრებლების თქმით, წყალმომარაგების პრობლემა სოფელ თოთხამში უფრო მწვავეა. სოფლის ერთ ნაწილს წყალთან დაკავშირებით განსაკუთრებით სერიოზული სირთულეები აქვს, რის გამოც ახალი წყალსადენის მშენებლობა მოსახლეობისთვის დიდხანს ნატrowნ პროექტს წარმოადგენდა.
თოთხამის თემში მერის წარმომადგენლის, რუდიკ ირიციანის განცხადებით, სამუშაოების დასრულებამდე დიდი დრო არ დარჩა.
„წყალსადენის გაყვანის სამუშაოები დაახლოებით 10-15 დღეში დასრულდება. მალე ჩვენს სოფელს წყლის პრობლემა აღარ ექნება.“
თუ სამუშაოები დაგეგმილ ვადებში დასრულდება, ახალი სისტემა ექსპლუატაციაში სრულად შევა.
ახლა მთავარი მოლოდინი სამუშაოების ხარისხიანად და შეუფერხებლად დასრულებაა. პასუხისმგებელი პირების თქმით, პროექტის გეგმის მიხედვით განხორციელების შემთხვევაში, ორივე სოფლის მცხოვრებლები უფრო სტაბილური და უწყვეტი წყალმომარაგებით ისარგებლებენ.
კორხსა და თოთხამში წყალმომარაგების პრობლემის მოგვარებას ელოდებიან არა უბრალოდ როგორც მორიგ ინფრასტრუქტურულ პროექტს, არამედ როგორც ცვლილებას, რომელიც პირდაპირ იმოქმედებს ყოველდღიური ცხოვრების ხარისხზე. სოფლის მაცხოვრებლებისთვის წყალი მხოლოდ ინფრასტრუქტურა არ არის — ეს სოფლად ნორმალური ცხოვრების, არსებობისა და შრომის ერთ-ერთი უმთავრესი პირობაა.
