ასფარა – სოფელი, სადაც ორი წელია მცხოვრები არ არის, მაგრამ დღეს იქაც გაიხსნა საარჩევნო უბანი, სადაც მოჩვენებით სოფლის მოსახლეობას შეუძლია ხმა მისცეს პარტიებს, რომლებიც საქართველოს პარლამენტში შევა.
სოფელი ფოკადან 8 კმ-ში, ხოლო ნინოწმინდიდან 38 კმ-ში მდებარეობს. არჩევნების დღე აქ ქარბუქით დაიწყო, რომელმაც ისედაც შეუმჩნეველი გზა ჩაკეტა. ნინოწმინდის მუნიციპალიტეტის (ჯავახეთი) სოფელ ასფარის ბოლო მცხოვრებლები ორიოდე წლის წინ ყველაზე მიუწვდომელი სოფლიდან გადავიდნენ. მიუხედავად იმისა, რომ სოფელში საცხოვრებელი სახლი არ არის და აქ არავინ ცხოვრობს, კენჭისყრა რეგულარულად ტარდება.
№30 საარჩევნო უბანი არაიკ ანტონიანის სახლშია, რომელიც სოფელში არ ცხოვრობს, 11 საათისთვის 41 ამომრჩევლიდან აქ ხმა 4-მა მისცა.
საარჩევნო უბნის წინ მანქანები იყო გაჩერებული, მაგრამ საშინელი გზების გამო, სერიოზული მიზეზის გარეშე აქ მოსვლას ნაკლები თუ გარისკავდა.
საარჩევნო უბანი, ისევე როგორც სოფლის ყველა სახლი, ნახევრადდანგრეულ მდგომარეობაშია. თუმცა, მთელი პროცესი ჩატარდა პატარა ოთახში, სადაც საკმაოდ თბილოდა.
აქაც კი, საარჩევნო ყუთის წინ, პატარა მონაკვეთზე, მმართველი პარტიის კამერა იყო განთავსებული.
საარჩევნო საუბნო კომისია ძირითადად ასფარის მკვიდრებისგან შედგება, თუმცა, როგორც ამბობენ, მძიმე პირობების გამო ყველა მცხოვრები სომხეთში, მეზობელ სოფლებში: ტამბოვკაში, ვლადიმიროვკაში, ფოკასა და ნინოწმინდაში გადავიდა. სიიდან 10 ადამიანი, კომისიის წევრების თქმით, ფაქტობრივად ნინოწმინდაში მცხოვრები ერთი ოჯახიდანაა.
როგორც კომისიის წევრებმა თქვეს, ადრე ერევანში მცხოვრებმა ასფარის მკვიდრებმა მიკროავტობუსი დაიქირავეს და არჩევნებში მონაწილეობის მისაღებად მივიდნენ:
„დაინტერესებული იყვნენ, და აი მოვიდნენ. იქნებ ფული მისცეს, 10 კაცი მოვიდა მიკროავტობუსით“, – ამბობს კომისიის ერთ-ერთი წევრი. დღეს კი საარჩევნო უბნის კომისია ამომრჩევლებს ელოდა.
Jnews-მა ამ სოფლის არჩევნების შედეგებს პირველად მას შემდეგ მიაქცია ყურადღება, რაც 2021 წელს ამ უბანზე (მაშინ №31 იყო), ნინოწმინდის მუნიციპალიტეტის სოფელ ასფარაში 46 ამომრჩეველი დარეგისტრირდა და მათგან 34-მა მისცა ხმა.
