ახალქალაქის რაიონულ სასამართლოში გუშინ, 1 სექტემბერს, მეუღლის მშობლების ოჯახის 5 წევრის მკვლელობის მცდელობის საქმეზე, ს.მ. საქართველოს სისხლის სამართლის კოდექსის 59-ე მუხლით გაასამართლეს, ბრალდებულს ჯამურად თავისუფლების 20 წლით აღკვეთა მიესაჯა. ბრალდებულს ბრალი წარედგინა საქართველოს სისხლის სამართლის კოდექსის სხვადასხვა მუხლებით: „განზრახ მკვლელობის მცდელობა დამამძიმებელ გარემოებაში“, „ძალადობა ოჯახში“, „ცივი იარაღის ტარება“…
ახალქალაქის რაიონულმა სასამართლომ სრულად გაიზიარა პროკურატურის მიერ წარდგენილი მტკიცებულებები და მეუღლის მშობლების ოჯახის ხუთი წევრის განზრახ მკვლელობის მცდელობის ფაქტზე ბრალდებული დამნაშავედ ცნო.
სასამართლო პროცესზე გამოკვლეული მტკიცებულებებით დადასტურდა, რომ ოჯახში ძალადობისთვის და მუქარისთვის ნასამართლევმა ს.მ.-მ არასრულწლოვანი შვილის თანდასწრებით, მეუღლეს ფიზიკური შეურაცხყოფა მიაყენა.
ასევე, ბრალდებული 2021 წლის 11 დეკემბერს, მეუღლის მშობლების სახლში მივიდა, სადაც დანით დაზიანებები მიაყენა მეუღლის დედ-მამას, მეუღლის დას, მეუღლის ძმის ცოლს და ამ უკანასკნელის მცირეწლოვან შვილს. დროულად აღმოჩენილი სამედიცინო დახმარების შედეგად, დაზარალებულების გადარჩენა მოხერხდა.
სამართალდამცველებმა ბრალდებული იმავე დღეს დააკავეს. მას ბრალდება ოჯახში ძალადობის და დამამძიმებელ გარემოებებში მკვლელობის მცდელობის ჩადენისთვის წარედგინა.
ახალქალაქის რაიონულმა სასამართლომ ბრალდებული სრულად ცნო დამნაშავედ წარდგენილ ბრალდებაში და სასჯელის სახედ და ზომად 20 წლით თავისუფლების აღკვეთა განუსაზღვრა.
