ჯავახეთში სურბ სარგისის დღესასწაულს განსაკუთრებულად აღნიშნავენ, ახალქალაქიდან და რეგიონის სოფლებიდან ახალგაზრდები, წყვილები და ხანდაზმულები სალოცავად სოფელ დილისკას სურბ სარგისის ეკლესიაში მიდიან.
ტრადიციის თანახმად, ახალგაზრდები, რომლებსაც ჯერ კიდევ არ უპოვიათ თავიანთი მეორე ნახევარი, დღესასწაულის წინა დღეს მარხულობენ, საღამოს მიირთმევენ მარილიან კვერს ან მსგავს საკვებს, იმ იმედით, რომ სიზმარში მომავალ რჩეულს ნახავენ…
„ბებიაჩემმა მითხრა ძილის წინ, საწოლთან ერთი ჭიქა წყალი დადე, ჭიქაზე სარკე და გვერდით სავარცხელი. ტრადიციის მიხედვით, სიზმრის შემდეგ, როცა გაიღვიძებ, სარკეში რომ ჩაიხედო, მომავალ რჩეულს დაინახავ, მაგრამ სავარცხელი რისთვის არის არ მახსოვს. ამბობდა, რომ სასურველია ახალი სავარცხელი, ან შენი პირადი, რომელსაც მხოლოდ შენ იყენებ”,- ამბობს ერთ-ერთი მომლოცველი.
დილისკაში მომლოცველობის ერთ-ერთი თავისებურება ის არის, რომ ახალგაზრდები ეკლესიაში ცვლიან სანთლებს. ტრადიციის თანახმად, თუ გოგონა სანთლებს გაცვლის ახალგაზრდა ბიჭთან და ძილის წინ ბალიშის ქვეშ დაიდებს, სიზმარში აუცილებლად იხილავს თავის რჩეულს.
„სანთლებს გავცვლი, რომ საბედო ვნახო, იმედია სიმპათიური იქნება“, – ამბობს ერთ-ერთი მომლოცველი.
“მთელი დღე არაფერი მიჭამია, რამდენიმე წელია ყოველ ჯერზე ვმარხულობ, მაგრამ მაინც არავის მინახავს, წელსაც ვერავის ვნახავ”, – პასუხობს მეორე, ხოლო ერთ-ერთი გათხოვილი ქალი ხუმრობით მიმართავს გოგონებს: „მიმოიხედე ირგვლივ და ნახავ რეალობაში”.
ბევრი ზრდასრული ამტკიცებს, რომ ახალგაზრდობაში ნახეს ქმრები „სურბ სარგისის ღამეს“.
„სიზმარში ვნახე მამაკაცი, რომელიც ჩემს უკან იდგა, მისი სახე არ მენახა, მაგრამ აშკარად მხოლოდ ქურთუკი მახსოვდა, წყალი მომაწოდა, წყალში ბუშტები იყო, მე არ ავიღე. როცა ქალი წამოვიდა, მანაც მომცა ჭიქა წყლით, ავიღე ჭიქა, რომელიც ქალმა მომცა და რეალურად, იგივე ქურთუკით შემოვიდა მამაკაცი ჩვენს სახლში ხელის სათხოვნელად, მე უარი ვუთხარი და ის ქალი ჩემი ქმრის ერთ-ერთი ნათესავი აღმოჩნდა“, – ყვება 50 წლის ქალი და შთააგონებს ახალგაზრდებს სწამდეთ სურბ სარგისის ძალის.
მომლოცველების თქმით, გოგონა წინასწარმეტყველურ სიზმარს მხოლოდ ქორწინების წელს ხედავს, თუ ამას ვერ ხედავს, ჯერ დრო არ არის.
წლეულს სიყვარულის მფარველის დღესასწაული 12 თებერვალს აღინიშნება. ახალგაზრდები დიდი შთაგონებით ელიან ამ დღესასწაულს. ტრადიციისამებრ, სურბ სარგისი სწრაფად მიემართება ყველას დასახმარებლად, განსაკუთრებით, სიძნელეების წინაშე მყოფ მოსიყვარულე გულებისკენ.
