5 თებერვალს, ბაქოს სამხედრო სასამართლომ არცახის (მთიანი ყარაბაღის) სამხედრო-პოლიტიკური ხელმძღვანელების მიმართ გამოტანილი განაჩენი გამოაცხადა. როგორც გამოცემა Hetq.am წერს, არწახის მეოთხე პრეზიდენტს — არაიკ ჰარუთიუნიანს, თავდაცვის არმიის ყოფილ სარდალს — ლევონ მნაცაკანიანს, სარდლის ყოფილ მოადგილეს — დავით მანუკიანს, არცახის პარლამენტის ბოლო თავმჯდომარეს — დავით იშხანიანს და პრეზიდენტის ყოფილ მრჩეველსა და ყოფილ საგარეო საქმეთა მინისტრს — დავით ბაბაიანს უვადო თავისუფლების აღკვეთა მიესაჯათ.
რაც შეეხება არცახის რესპუბლიკის ყოფილ პრეზიდენტებს — არკადი ღუკასიანსა და ბაკო საჰაკიანს, მათ სასამართლომ 20-წლიანი პატიმრობა შეუფარდა.
მანამდე პროკურორმა აღნიშნა, რომ მიუხედავად იმისა, რომ არკადი ღუკასიანი და ბაკო საჰაკიანი ასევე ბრალდებულნი იყვნენ იმ მუხლებით, რომლებიც უვადო პატიმრობას ითვალისწინებს, მათი ასაკის (65 წელი) გათვალისწინებით, ბრალდების მხარემ შუამდგომლობით მიმართა სასამართლოს, აზერბაიჯანის სისხლის სამართლის კოდექსის მოთხოვნების შესაბამისად, მათთვის 20-წლიანი პატიმრობა მიესაჯა.
სასამართლო პროცესს მხოლოდ აზერბაიჯანული სახელმწიფო და ხელისუფლების მიერ კონტროლირებადი მედიასაშუალებები ესწრებიან. სხვა წყაროებიდან შეუძლებელია სასამართლო განხილვის დეტალების, ისევე როგორც სომხებისათვის მიწერილი განცხადებების სინამდვილის გადამოწმება.
ამავე საქმეზე კიდევ 8 სომხეთის მოქალაქე ფიგურირებს. მათგან მადათ ბაბაიანს 19 წლით თავისუფლების აღკვეთა მიესაჯა. პროკურორი ბაბაიანსაც იმ მუხლებით სდებდა ბრალს, რომლებიც უვადო პატიმრობას ითვალისწინებს, თუმცა, რადგან ისიც 65 წლისაა, ბრალდებამ მისთვის 20-წლიანი პატიმრობა მოითხოვა (საბოლოოდ სასამართლომ 19 წელი მიუსაჯა).
დანარჩენი მსჯავრდებულების სასჯელები ასე გადანაწილდა:
მელიქსეთ ფაშაიანი — 19 წლით პატიმრობა;
გარიკ მარტიროსიანი — 18 წლით პატიმრობა;
დავით ალავერდიანი — 16 წლით პატიმრობა;
ლევონ ბალაიანი — 16 წლით პატიმრობა;
ვასილი ბეგლარიანი — 15 წლით პატიმრობა;
ერიკ ყაზარიანი — 15 წლით პატიმრობა;
გურგენ სტეპანიანი — 15 წლით პატიმრობა.
15 სომეხ პატიმარს ბრალი წაუყენეს აზერბაიჯანის სისხლის სამართლის კოდექსის შემდეგი მუხლებით: 100 (აგრესიული ომის დაგეგმვა, მომზადება, წარმოება ან წარმოება), 102 (საერთაშორისო დაცვის ქვეშ მყოფ პირებსა და ორგანიზაციებზე თავდასხმა), 103 (გენოციდი), 105 (მოსახლეობის განადგურება), 106 (მონობა), 107 (მოსახლეობის გადაადგილება ან იძულებითი გადაყვანა), 109 (დევნა), 110 (პირთა იძულებით გაუჩინარება), 112 (საერთაშორისო სამართლის საწინააღმდეგო დაკავება), 113 (წამება), 114 (დაქირავებული მებრძოლი), 115 (ომის კანონებისა და წეს-ჩვეულებების დარღვევა), 116 (საერთაშორისო ჰუმანიტარული სამართლის დარღვევა შეიარაღებული კონფლიქტების დროს), 118 (ომის ძარცვა), 120 (განზრახ მკვლელობა), 192 (უკანონო ბიზნესი), 214 (ტერორიზმი), 214-1 (ტერორიზმის დაფინანსება), 218 (კრიმინალური საზოგადოების ორგანიზება (კრიმინალური ორგანიზაცია), 228 (უკანონო იარაღის, მათი კომპონენტების, საბრძოლო მასალის, ასაფეთქებელი ნივთიერებების და ასაფეთქებელი მოწყობილობების შეძენა, ტრანსპორტირება, გაყიდვა, შენახვა, გადაზიდვა ან ტარება), 270-1 (საავიაციო უსაფრთხოების წინააღმდეგ მიმართული საშიში ქმედებები), 277 (სახელმწიფო ან საზოგადო მოღვაწის მკვლელობის მცდელობა), 278 (ხელისუფლების ძალადობრივი ხელში ჩაგდება ან ძალაუფლების ძალადობრივი შენარჩუნება, სახელმწიფოს კონსტიტუციური წესრიგის ძალადობრივი შეცვლა), 279 (შეიარაღებული ფორმირებების ან ჯგუფების შექმნა) და სხვა მუხლები.
არცახის ყოფილი სახელმწიფო მინისტრის, რუბენ ვარდანიანის საქმე ცალკე წარმოებად განიხილება. არწახის სამხედრო-პოლიტიკური ლიდერები ბაქოში უკანონო პატიმრობაში 2023 წლის სექტემბრიდან იმყოფებიან. არწახის სრული ოკუპაციისა და ეთნიკური წმენდის შემდეგ, აზერბაიჯანის ძალოვანმა სტრუქტურებმა დააკავეს და ბაქოში გადაიყვანეს არწახის ყოფილი და მოქმედი სამხედრო-პოლიტიკური ხელმძღვანელობის 8 წარმომადგენელი.
მთავარი ფოტო: აზერბაიჯანის სახელმწიფო საინფორმაციო სააგენტო „აზერტაჯი“.
