შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს თანამშრომლებმა, გენერალურ პროკურატურასთან ერთად ჩატარებული ოპერატიულ-სამძებრო და საგამოძიებო მოქმედებების შედეგად, 30 პირი დააკავეს „კანონიერი ქურდობის“, „კრიმინალური საზოგადოების“ წევრობის, „კრიმინალური საზოგადოების“ საქმიანობის ხელშეწყობის და სხვა მუხლებით. 2 პირს ბრალი დაუსწრებლად წარედგინა.
საპოლიციო ოპერაციები ჩატარდა თბილისში, სამცხე-ჯავახეთში, იმერეთსა და კახეთში.
ძიებამ დაადგინა, რომ პირები, რომლებიც ბრალდებულნი არიან კრიმინალური დანაშაულებების ჩადენაში, პირადი სარგებლის მიღების მიზნით, მონაწილეობდნენ მოქალაქეებს შორის ფინანსური დავების მოგვარებაში, აწყობდნენ ე.წ. „ქურდულ გარჩევებს“ კონფლიქტის მონაწილე მხარეებთან, იღებდნენ გადაწყვეტილებებს ერთ-ერთი მხარის სასარგებლოდ ე.წ. „ქურდული ტრადიციების“ შესაბამისად და აიძულებდნენ მეორე მხარეს, გადაეხადა ფული. დადგენილი ვადების დარღვევის შემთხვევაში, ისინი ემუქრებოდნენ ფიზიკური ძალადობითა და სიკვდილით.
ძიებამ ასევე დაადგინა, რომ ე.წ. „კანონიერი ქურდი“ თენგიზ ხოფერია, მეტსახელად „ჩინკა“, რომელიც საზღვარგარეთ იმყოფება, მონაწილეობდა ე.წ. „ქურდულ გარჩევებში“ ბრალდებულებისა და მოდავე მხარეების მონაწილეობით.
პოლიციამ ჩაატარა ჩხრეკა ბრალდებულთა სახლებსა და ბინებში, რა დროსაც ნივთმტკიცებად ამოიღეს ცეცხლსასროლი იარაღი, საბრძოლო მასალა და ფული. ასევე ამოღებულია ბრალდებულთა მობილური ტელეფონები, რომლებსაც ისინი ერთმანეთთან და საზღვარგარეთ მცხოვრებ ქართველ „კანონიერ ქურდებთან“ კომუნიკაციისთვის იყენებდნენ.
დანაშაულისთვის სასჯელი 15 წლამდე თავისუფლების აღკვეთას ითვალისწინებს.
