რეგიონული მედიის ცნობით, რუსეთმა სომხური სასოფლო-სამეურნეო პროდუქციის ნაწილი უკან, იმპორტიორ ქვეყანაში დააბრუნა.
მედიის ცნობით, რუსეთში საქართველოს ტერიტორიის გავლით მიმავალი სასოფლო-სამეურნეო პროდუქტებით დატვირთული ასობით სატვირთო მანქანა „ზემო ლარსის“ სასაზღვრო-გამშვები პუნქტიდან სომხეთში დაბრუნება აიძულეს.
რუსული მხარე ამტკიცებს, რომ პროდუქცია ფიტოსანიტარულ სტანდარტებს არ შეესაბამებოდა, ხოლო სომხური მხარე ამას არ ეთანხმება და პოლიტიკურ მოტივებზე ამახვილებს ყურადღებას.
უნდა აღინიშნოს, რომ შეზღუდვები მხოლოდ სასოფლო-სამეურნეო პროდუქციას არ შეხებია. ბოლო კვირების განმავლობაში რუსეთმა მკაცრი კონტროლი დააწესა სხვა სახის ტვირთებზეც, განსაკუთრებით სამშენებლო მასალებზე.
ანალიტიკოსები აღნიშნავენ, რომ ეს ნაბიჯი შესაძლოა მოსკოვის მცდელობა იყოს, გამოიყენოს სავაჭრო წესები, როგორც პოლიტიკური ბერკეტი, სომხეთის საგარეო პოლიტიკისა და უსაფრთხოების საკითხებზე არსებული უთანხმოებების ფონზე.
მედიის ცნობით, „ზემო ლარსის“ სასაზღვრო-გამშვები პუნქტი, რომელიც სომხეთს რუსეთთან საქართველოს გავლით აკავშირებს, სომხური ვაჭრობისთვის გადამწყვეტი მნიშვნელობისაა. მათი მონაცემებით, ამ გზით ყოველდღიურად დაახლოებით 150 სომხური სატვირთო მანქანა გადაადგილდება.
