ახალქალაქის №3 საბავშვო ბაღში სარემონტო სამუშაოები გრძელდება. სამუშაოები ოქტომბრის პირველ ნახევარში დაიწყო და 2025 წლის აპრილში უნდა დასრულდეს.
მშენებლების თქმით, სამუშაოები დაახლოებით 25 დღის წინ დაიწყო.
„ახლა ვანგრევთ, ვხსნით ყველაფერს, მერე ვაკეთებთ ახალს, რომ ხარისხიანი იყოს. არავითარი სირთულე არ არის, ყველაფერი ნორმალურად არის. სულ 4 კაცი ვართ. ყველა ადგილობრივია, მხოლოდ მე ვარ ახალციხიდან“, – აკომენტარებს სამუშაოზე პასუხისმგებელი აღას გრიგორიანი.
მისი თქმით, სურთ რაც შეიძლება მალე დაასრულონ.
№3 საბავშვო ბაღს შპს „ლაგი კაპიტალი“ არემონტებს, ხელშეკრულების ჯამური ღირებულება ყველა სამუშაოსა და მომსახურების ჩათვლით 3`261`495 ლარს შეადგენს. პრეისკურანტის ღირებულება 1`775`269.93 ლარს შეადგენს. სამუშაოები უნდა დასრულდეს ხელშეკრულების გაფორმებიდან 16 კალენდარულ თვეში, ანუ 2025 წლის აპრილამდე.
№3 საბავშვო ბაღის რემონტის დასაწყებად შენობა 2024 წლის 5 სექტემბრამდე უნდა დაცლილიყო, თუმცა რემონტი მხოლოდ ოქტომბერში დაიწყო.
შეგახსენებთ, რომ 2024 წელს ქალაქში 3 საბავშვო ბაღის კაპიტალური რემონტი დაიწყო, ხოლო ახალი საბავშვო ბაღის მშენებლობა ახალქალაქში კიდევ უფრო ადრე დაიწყო, ყველა სამუშაოს მუნიციპალური განვითარების ფონდი აფინანსებს.
ქალაქ ახალქალაქის №1 და №2 საბავშვო ბაღებს შპს “მედმშენი” არემონტებს. ტენდერი პრესიკურანტის მიხედვით გამოცხადდა, პრეისკურანტის სავარაუდო ღირებულებაა 1 830 175,19 ლარი, სამუშაოს ჯამური ღირებულება 7 522 000 ლარს შეადგენს. სამუშაოები 2025 წლის თებერვლამდე უნდა დასრულდეს, თუმცა №1 საბავშვო ბაღში მშენებლობა ჯერ არ დაწყებულა.
№5 სკოლის (ყოფილი სკოლა-ინტერნატი) ტერიტორიაზე ახალ საბავშვო ბაღს კომპანია ”აი ქეი ბი ბილდი” 1 657 000 ლარად აშენებს. სამუშაოები 2024 წლის ბოლომდე უნდა დასრულდეს.
ამასობაში, ქალაქის საბავშვო ბაღის მოსწავლეები, რომელთა მშობლები მუშაობენ და ბავშვს ვერავისთან ტოვებენ, სოფლის საბავშვო ბაღებში ატარებენ
