კუმურდო ნაგავის საკითხებში ერთ-ერთი პრობლემური სოფელია. სოფელში ბევრი ხელოვნური ნაგავსაყრელია, რომელიც როგორც მცხოვრებლების, ასევე სერვის ცენტრის ბრალეულობით გაჩნდა. ბევრი მოსახლე მზადაა გადაიხადოს სერვის ცენტრის მომსახურება, რათა მათ სოფელში სისუფთავე შეინარჩუნონ.
ზაფხულში ახალქალაქის სერვის ცენტრმა 198 666 ლარის ღირებულების 117 სანაგვე ურნა მიიღო და 24 სოფელში გაანაწილა. ახალი ურნების დამონტაჟების შემდეგ, ნაგვის გატანის საფასურის შეგროვება კიდევ 12 სოფლიდან დაიწყეს. ამ პარტიიდან კუმურდოში ნაგვის ურნები არ დამონტაჟდა. სერვის ცენტრმა Jnews-ის კომენტარში აღნიშნა, რომ ურნების შემდეგ მიღებაზე სოფელ კუმურდოში დაამონტაჟებენ, საიდანაც ნაგვის გატანის საფასურის აკრეფასაც დაიწყებენ.
Jnews-ი სოფლის მოსახლეობას ესაუბრა, მზად არიან თუ არა ამ მომსახურების საფასური გადაიხადონ. Jnews-თან საუბარში სოფლის მცხოვრებლებმა აღნიშნეს, რომ მათ სოფელში ახალი სანაგვე ურნები არ დამონტაჟებულა, თუმცა საჭიროება არის, რომ მთელი სოფლისთვის საკმარისი იყოს.
„ახლა ნაგვის ურნები არ არის საკმარისი. დაშორებულ ქუჩებზეც უნდა ხალხს, რომ სისუფთავე იყოს. ნაგვის შორს წაღება არ უნდათ, იძულებულნი არიან სადმე სსხვაგან გადაყარონ. მერე ამას საქონელი ჭამს, ავადდება და ეს ყველა ჩვენგანისთვის საზიანოა. სანაგვე ურნების რაოდენობა რომ გაეზარდათ უკეთესი იქნებოდა“, – კომენტარი გააკეთა ალბერტ ჩოლახიანმა.
ჩვენ მიერ გამოკითხულ მოსახლეობას არ გაუგია, რომ მათ სოფელში ნაგვის შეგროვების საფასურის შემოღება სურდათ. თუმცა, უმრავლესობამ აღნიშნა, რომ ისინი ამ სიახლის წინააღმდეგი არ არიან.
„ეს საერთო საკითხია. ჩვენ ორნი მთელი სოფლის სახელით ვერ ვისაუბრებთ. უნდა შევიკრიბოთ და ყველას ვკითხოთ. პირადა ჩემი აზრით, თვეში 50 თეთრი არაფერია. მაგრამ ჩვენს სოფელში 400 სახლია, მაშინ ჩვენ 100, ან მინიმუმ 50 ურნა გვჭირდება“, – ამბობს სოფლის მკვიდრი მარტინ სააკიანი.
სოფლის ერთ-ერთმა მცხოვრებმა, რომელმაც საკუთარი თავის წარდგენა არ ისურვა, აღნიშნა, რომ ნაგვის გატანის საფასური სახელმწიფომ უნდა გადაიხადოს და არა სოფლის მოსახლეობამ, თუმცა შეგროვების წინააღმდეგი არ არის.
„არ გამიგია, რომ სოფელში ნაგვის გადასახადი უნდა შემოიღონ. ეს არა მხოლოდ ჩვენ გვჭირდება, ეს ყველას სჭირდება, ეს არის სისუფთავე, კულტურა. ეს სახელმწიფომ უნდა გააკეთოს. რა თქმა უნდა, გადასახადი რომ დააწესონ, წინააღმდეგი არ ვიქნები, არც არავინ იქნება წინააღმდეგი».
აღსანიშნავია, რომ კუმურდოში 400-ზე მეტი მეურნეობა და 2000-ზე მეტი ადამიანია. სოფელში ამჟამად 14 ნაგვის ურნაა განთავსებული.
შეგახსენებთ, რომ ახალქალაქის მუნიციპალიტეტში ერთ ადამიანზე ფიზიკურ პირებზე ნაგვის გატანის ტარიფი 50 თეთრია, თუ ოჯახში ოთხზე მეტი ადამიანია, გადასახადი 2 ლარს შეადგენს, იურიდიული პირები კი 1 კუბ/მ 25 ლარს იხდიან. კონტროლიორები, რომლებიც მოსახლეობისგან სააბონენტო გადასახადს აგროვებენ, ხელფასის სახით შეგროვებული თანხის 30%-ს ღებულობენ.
