დასრულდა პროექტი, რომლის ფარგლებშიც ახალქალაქისა და ნინოწმინდის მუნიციპალიტეტებმა ოფიციალური ვებგვერდები შეიძინეს. თუმცა ახალქალაქის ვებ-გვერდს მრავალი მომსახურება აკლია, გვერდი სომხურ და ინგლისურ ენებზეც უნდა ითარგმნოს.
20 დეკემბერს ახალქალაქისა და ნინოწმინდის მუნიციპალიტეტების ოფიციალური გვერდები ამოქმედდა. ისინი პროექტის „ახალქალაქისა და ნინოწმინდის მუნიციპალიტეტების თვითმმართველობის გამჭვირვალობისა და ანგარიშვალდებულების გაუმჯობესების“ ფარგლებში შეიქმნა და ამოქმედდა, რომელსაც „ახალქალაქის ზრდასრულთა განათლების ცენტრი“ სამოქალაქო საზოგადოების ინიციატივით (STAR ინიციატივა), ევროკავშირისა და კონრად ადენაუერის ფონდის ფინანსური მხარდაჭერით ხელმძღვანელობს. გვერდები ახალქალაქისა და ნინოწმინდის მუნიციპალიტეტებში ადგილობრივი თვითმმართველობის ინდექსით გათვალისწინებული კრიტერიუმების შესრულების გასაადვილებლად არის შექმნილი.
„პროექტის მიზანი მუნიციპალიტეტის დახმარება იყო. მიმდინარე წლის ბოლოს მუნიციპალიტეტების გამჭვირვალობის შეფასების შედეგები გახდება ცნობილი. როდესაც ვაანალიზებდით, რატომ მიიღეს მუნიციპალიტეტებმა ნულოვანი პროცენტი (წინა შეფასებების დროს), ერთ-ერთი მიზეზი გამჭვირვალობის უქონლობა აღმოჩნდა. არ ჰქონდათ გვერდი, ვერ ახერხებდნენ სიახლეების გარცელებას. არსებული გვერდი კი სახელმწიფო მოთხოვნებს ვერ აკმაყოფილებდა და ოფიციალურ საიტად არ ითვლებოდა. სწორედ ამიტომ შევქმენით ახალი ვებგვერდი“, – განმარტავს პროექტის მენეჯერი მახარე მაცუკატოვი.
სამივე გვერდის (ქართული, სომხური და ინგლისური) ინტერფეისი მხოლოდ ქართულადაა, ხოლო ინტერაქტიული ნაწილი არ ფუნქციონირებს. გვერდი ძალიან ხშირად ითიშება. ყოველივეს მიუხედავად, პროექტის ავტორებს იმედი აქვთ, რომ გვერდის არსებობა ახალქალაქისა და ნინოწმინდის მუნიციპალიტეტების გამჭვირვალობის ინდექსის რეიტინგში დაწინაურებას შეუწყობს ხელს.
„ამ ეტაპზე შემიძლია ვთქვა, რომ ინდექსის გაზრდაში გარკვეულწილად დავეხმარეთ. მთელი საქართველოს მასშტაბით ერთ-ერთი საუკეთესო, თანამედროვე დიზაინის მქონე საიტი შევქმენით და რამდენიმე მუნიციპალიტეტი უკვე დაგვიკავშირდება და მაგალითს ახალქალაქიდან და ნინოწმინდიდან იღებს. ახლა ყველაფერი მუნიციპალურ ხელისუფლებაზე, მერიაზეა დამოკიდებული. ინფორმაცია უნდა განათავსონ და სამ ენაზე თარგმნონ“, – აცხადებს მახარა მაცუკატოვი.
პროექტი „ახალქალაქისა და ნინოწმინდის მუნიციპალიტეტების თვითმმართველობის გამჭვირვალობისა და ანგარიშვალდებულების გაუმჯობესება“ 2022 წლის 1 ივლისს და 2023 წლის 31 მარტს მოიცავდა. ინიციატივა მიზნად ისახავდა სამოქალაქო საზოგადოების, როგორც დამოუკიდებელი, მდგრადი, გამჭვირვალე და ანგარიშვალდებული სუბიექტის გაძლიერებას მთელი საქართველოს მასშტაბით. მისი წარმატებით განხორციელება ხელს შეუწყობს გამჭვირვალე, ანგარიშვალდებული და სწორი მმართველობის პრინციპებზე დაფუძნებული ადგილობრივი თვითმმართველობის ჩამოყალიბებას, ადგილობრივი თვითმმართველობაში მოქალაქეების მონაწილეობის გაზრდას.
