სიახლე სამცხე- ჯავახეთი

ახალქალაქში პრივატიზაციისას კორუფციის რისკები გაჩნდა

---

“საერთაშორისო გამჭვირვალობა – საქართველო – TIG”-იმ სამცხე-ჯავახეთში სახელმწიფო მიწების ელექტრონული აუქციონის წესით შესყიდვის შესახებ კვლევა ჩაატარა, რომლის შედეგადაც ორგანიზაციამ პრივატიზაციის პროცესში შესაძლო კორუფციული გეგმები გამოავლინა – პარტია „ქართული ოცნების“ მხარდამჭერები და მათი ოჯახის წევრები 2013-2021 წლებში ქონებას კონკურსის გარეშე იჩენდნენ.

TI-ის ანგარიში მიწის პრივატიზაციის შესახებ 9 ნოემბერს გამოქვეყნდა. ანგარიშის მიხედვით, 2013-2021 წლებში სამცხე-ჯავახეთში „ქართულ ოცნებასთან“ ასოცირებულმა და თანამდებობაზე მყოფმა პირებმა, ასევე მათი ოჯახის წევრებმა (სულ 39 სუბიექტი) 54 ელექტრონულ აუქციონზე 129 775 კვ.მ მიწის ნაკვეთი იყიდეს. მთლიანობაში მიწის ნაკვეთი 7 725 685 ლარად შეიძინეს. გასხვისებული მიწის 75% (97 417 კვ.მ) კონკურსის გარეშე 2 938 300 ლარად გაიყიდა. 8 ობიექტი – 378 223 კვ.მ – პირდაპირი გაყიდვით 1 458 387 ლარად მიიღეს.

რეგიონის მასშტაბით 2013-2021 წლებში 23 თანამდებობის პირმა თუ მათი ოჯახის წევრმა  61 511 კვ.მ მიწის ნაკვეთი შეიძინა, რომლიდანაც 93.7% კონკურსის გარეშე, პირველივე საფეხურზე შეისყიდეს. ამ ობიექტებიდან 7 ახალქალაქში, 2 ნინოწმინდაში და დანარჩენების უმეტესობა ახალციხეში მდებარეობს.

ახალქალაქის თანამდებობის პირების, ან მათი ოჯახის წევრების შესახებ კვლევაში აღნიშნულია:

1. 2014 წლის 30 სექტემბერს ასია დანიელიანმა ელექტრონულ აუქციონზე ტენდერის გარეშე 27 000 ლარად 1 421 კვ.მ არასასოფლო-სამეურნეო დანიშნულების მიწის ნაკვეთი შენობასთან ერთად (ყოფილი სამრეცხაო) იყიდა. ახალქალაქის მუნიციპალიტეტის გამგებელი მისი ვაჟი ჰართიუნ ჰოვანესიანი იყო.
2. ორი კვირის შემდეგ, 2014 წლის 16 ოქტომბერს, ჰარუთიუნ ჰოვაეისიანმა 28 500 ლარად 1 351 კვ.მ არასასოფლო-სამეურნეო დანიშნულების მიწის ნაკვეთი იმავე მისამართზე, ახალქალაქში, მალხასიანის ქუჩა N2-ში იყიდა.
3. შპს „მეეკიმ“ 2016 წლის 25 თებერვალს, ახალქალაქში, კარწახში, ელექტრონული აუქციონის გზით, 92 000 ლარად 1500 კვ.მ-ის არასასოფლო-სამეურნეო მიწის ნაკვეთი შეიძინა.  „მეეკი“ ენზელ მკოიანის ოჯახური კომპანიაა. იგი იმ პერიოდში საქართველოს პარლამენტში “ქართული ოცნების” მაჟორიტარი დეპუტატი იყო.
4. 2016 წლის 30 მარტს არტურ ირიციანმა ელექტრონულ აუქციონზე 21 100 ლარად 676 კვ.მ არასასოფლო-სამეურნეო დანიშნულების მიწა ახალქალაქის სოფელ კოთელიაში შეიძინა. მისი ძმა ნაირი ირიციანი კი ახალქალაქის საკრებულოს თავმჯდომარის მოადგილე იყო.
5. 2017 წლის 24 მარტს ვარდ მოსოიანმა ახალქალაქის მუნიციპალიტეტის სოფელ თოთხამში 1308 კვ.მ არასასოფლო-სამეურნეო დანიშნულების მიწის ნაკვეთი იყიდა. აუქციონი კონკურსის გარეშე ჩატარდა და ტერიტორია 8 000 ლარად შეისყიდა. იგი საქართველოს გაერთიანებული წყალმომარაგების კომპანიის ახალქალაქის სერვისცენტრის მენეჯერი იყო.
6. ედუარდ საარიანმა 2018 წლის 23 ივნისს 9 500 ლარად, ტენდერის გარეშე, ახალქალაქის სოფელ ვაჩიანში (ხარტა) 4 400 კვ.მ ფართობის არასასოფლო-სამეურნეო დანიშნულების მიწის ნაკვეთი და დანგრეული შენობა იყიდა. მისი ძმა აშოტ საარიანი ახალქალაქის საკრებულოში ფრაქცია „ქართული ოცნება-კონსერვატორების“ თავმჯდომარე იყო.
7. 2020 წლის 24 ნოემბერს არტურ მკოიანმა 3 900 ლარად სოფელ დილისკაში 325 კვ.მ-ის არასასოფლო-სამეურნეო მიწის ნაკვეთი იყიდა. იგი ახალქალაქის საკრებულოში ფრაქცია „ქართულ ოცნება-ახალგაზრდობას“ ხელმძღვანელობდა.

TI-ის ანგარიშში გამოქვეყნებულია „ქართულ ოცნებასთან“ დაახლოებული პირების მიერ მიწის შესყიდვის მონაცემები – 8 სუბიექტი, რომელთაგან ერთი ახალქალაქიდანაა.

1. 2019 წლის 31 მაისს სამველ გოგორიანმა ახალქალაქში, აღმაშენებლის ქუჩასთან 41 000 ლარად 1 629 კვ.მ-ის არასასოფლო-სამეურნეო მიწის ნაკვეთი შეისყიდა. ის ქართული ოცნების დეპუტატის სამველ მანუკიანის ბიზნესპარტნიორია. სამველ გოგორიანი და სამველ მანუკიანი შპს “Geofood”-ის 50-50%-ის თანამფლობელები იყვნენ.

ანგარიშში აღნიშნულია ბიძინა ივანიშვილის სახელთან დაკავშირებული კომპანიების მიერ მიწის შესყიდვისას შესაძლო კორუფციის ფაქტები, თუმცა 8 კომპანიიდან არცერთი არ უკავშრდება ახალქალაქს. მიწები აბასთუმანში შეიძინეს.

ორგანიზაცია TI-მ საეჭვოდ მიიჩნია პირდაპირი პრივატიზაციის ზოგიერთი შემთხვევაც, თუმცა ახალქალაქი არც აქ ფიქსირდება.