ახალქალაქელების საყვარელი ადგილი ამირანის გორაზე, სოფელ ბავრის ხიდთან, რომელსაც ადგილობრივები „ბრდნოცს“ ეძახიან, ჭაობდება. მიზეზები ჯერჯერობით უცნობია.
Jnews-მა ახალქალაქის არაგულგრილი მცხოვრებლებისგან ფოტოები მიიღო შეტყობინებით, რომ ე.წ. თავშანკაზე პირველი პავილიონის მიმდებარე ტერიტორია წყლისა და ტალახის გამო გაუვალია. ამ ყველაფერს უსიამოვნო სუნი ახლავს. თვითმხილველები ამტკიცებენ, რომ 2 კვირის წინ ამ ტერიტორიაზე ჭაობის კვალი არ ყოფილა.
რელიეფის გაუვალობის გამო მდინარე თაფარვანის ნაპირამდე მისვლა ვერ მოვახერხეთ. ტერიტორია დაჭაობებულია.
დავუკავშირდით საქართველოს გაერთიანებული წყალმომარაგების ახალქალაქის სერვის ცენტრში, რათა გაგვეგო, გადის თუ არა ამ ტერიტორიაზე წყლის კომუნიკაციები, გვითხრეს, რომ კომპანიას ამ ტერიტორიაზე აქვს კომუნიკაციები, თუმცა ამას ადგილზე დააზუსტებენ კონკრეტულ ტერიტორიაზე არის თუ არა. ამის შესახებ მკითხველს მომდევნო მასალაში შევატყობინებთ.
