უკრაინასა და რუსეთს შორის მოლაპარაკებების პირველი რაუნდი დასრულდა. მხარეები თავიანთ დედაქალაქებში ბრუნდებიან. უკრაინული მედიის ცნობით, ამის შესახებ უკრაინის პრეზიდენტის მრჩეველმა მიხაილ პოდოლიაკმა განაცხადა.
„უკრაინისა და რუსეთის დელეგაციამ დღეს გამართა მოლაპარაკებების პირველი რაუნდი, რომლის მთავარი მიზანია უკრაინის ტერიტორიაზე ცეცხლისა და საომარი მოქმედებების შეწყვეტა. მხარეებმა განსაზღვრეს არაერთი პრიორიტეტული თემა, რომლებზეც მიღებულია გარკვეული გადაწყვეტილებები“, – განაცხადა პოდოლიაკმა.
პოდოლიაკის თქმით, ახლა მხარეები კონსულტაციებისთვის თავიანთ დედაქალაქებში ბრუნდებიან, რათა ამ გადაწყვეტილებებს მიეცეს გარკვეული შესაძლებლობები ლოგისტიკური გადაწყვეტილებების განსახორციელებლად.
უკრაინის პრეზიდენტის მრჩეველმა განაცხადა, რომ მხარეებმა განიხილეს მოლაპარაკებების მეორე რაუნდის გამართვის შესაძლებლობა უახლოეს მომავალში, რომელზეც ეს თემები მიიღებენ კონკრეტულ პრაქტიკულ განვითარებას.
თავის მხრივ, რუსული დელეგაციის ხელმძღვანელმა, ვლადიმირ მედინსკიმ აგრეთვე დაადასტურა, რომ მომდევნო შეხვედრა უახლოეს დღეებში, პოლონეთ-ბელარუსის საზღვარზე გაიმართება.
„ამ დრომდე თითოეული დელეგაცია, თითოეული დელეგაციის ხელმძღვანელობა კონსულტაციებს გამართავს ყველა მოლაპარაკებების პოზიციებზე, საკუთარი ქვეყნების ხელმძღვანელობებთან“, – განაცხადა მედინსკიმ.
რუსული დელეგაციის კიდევ ერთი წევრის, ლეონიდ სლუცკის თქმით, კი „მხარეებმა ერთმანეთს მოუსმინეს და აღმოაჩინეს უამრავი მნიშვნელოვანი პუნქტი, რომლის მიღწევაც შეიძლება“.
