სომხეთის პრეზიდენტმა არმენ სარქისიანმა თანამდებობა დატოვა.
პრეზიდენტის ვებგვერდზე გამოქვეყნებულ განცხადებაში ის გადადგომის მიზეზებს განმარტავს. მისი თქმით, ეს გადაწყვეტილება სრულიად არაემოციურია და გარკვეული ლოგიკიდან მოდის.
სარქისიანის განცხადებით, აღნიშნულზე ძალიან დიდხანს ფიქრბდა და გადაწყვიტა, დაახლოებით ოთხი წლის აქტიური მუშაობის შემდეგ, გადამდგარიყო რესპუბლიკის პრეზიდენტის პოსტიდან.
მისი შეფასებით, პრეზიდენტს არ აქვს საჭირო ინსტრუმენტები დღევანდელ რთულ პირობებში.
“გვაქვს პარადოქსული სიტუაცია, როდესაც პრეზიდენტი იძულებულია იყოს სახელმწიფოებრიობის გარანტი, ფაქტობრივად, რეალური ინსტრუმენტების გარეშე. კონსტიტუცია ასევე გულისხმობს ერთი დაწესებულების უპირატესობას მეორეზე, უქმნის დაბრკოლებებს დიასპორის სპეციალისტებს მონაწილეობა მიიღონ ისტორიული სამშობლოს სახელმწიფო ინსტიტუტების მართვაში და ა.შ.
ჩვენ ვართ საპარლამენტო რესპუბლიკა ფორმით, მაგრამ არა შინაარსით. ჩემი წინადადების აზრი და მიზანი იყო არა მმართველობის ერთი ფორმიდან მეორეზე გადასვლა (საპარლამენტოდან ნახევრად საპრეზიდენტო ან საპრეზიდენტოზე), არამედ კონტროლსა და ბალანსზე დაფუძნებული სახელმწიფო სისტემის შექმნა. ამის გარეშე ძნელია ლაპარაკი მნიშვნელოვან მიღწევებზე, რადგან პროგრესისა და წარმატების მიღწევა შესაძლებელია მხოლოდ პროგნოზირებად და ჰარმონიულ სისტემაში.
მოხარული ვარ, რომ შეიქმნა საკონსტიტუციო ცვლილებების კომისია, რისთვისაც მადლობას ვუხდი მთავრობას. იმედი მაქვს, საბოლოო ჯამში საკონსტიტუციო ცვლილებები მოხდება და მომავალი პრეზიდენტი და საპრეზიდენტო ინსტიტუტი შეძლებენ მუშაობას უფრო დაბალანსებულ გარემოში.
ჩვენ ვცხოვრობთ თავისებურ რეალობაში – რეალობაში, რომელშიც პრეზიდენტი ვერ ახდენს გავლენას ომსა და მშვიდობასთან დაკავშირებულ საკითხებზე.
რეალობა, როდესაც ის ვერ იყენებს ვეტოს იმ კანონებზე, რომლებსაც სახელმწიფოს და ხალხისთვის შეუფერებლად მიიჩნევს.
რეალობა, რომელშიც პრეზიდენტი ვერ გამოიყენებს თავისი პოტენციალის უპირატეს ნაწილს სისტემური საშინაო და საგარეო პოლიტიკური პრობლემების მოგვარებისთვის.
რეალობა, რომელშიც მსოფლიო მუდმივი ტურბულენტობის ზონაშია, მაგრამ პრეზიდენტს არ გააჩნია კონსტიტუციური ინსტრუმენტები, რომ დაეხმაროს თავის ქვეყანას”, – წერია განცხადებაში.
