ცენტრალურ პარკში ხალხმრავლობა იყო. ღონისძიება 14:00 საათზე დაიწყო, თუმცა ხალხმა ვაქცინაციის კარავთან რიგში დგომა ჯერ კიდევ გახსნამდე დაიწყო. პარკში ვაქცინაციის მობილური პუნქტი მოეწყო, სადაც თბილისელი სამედიცინო პერსონალი ყველა მსურველს ცრიდა. ვაქცინაციის კარავთან დასვენების ცენტრებში აცრილები 30 წუთის განმავლობაში ექიმების მეთვალყურეობის ქვეშ ისვენებდნენ. მობილური პუნქტები გადაიტვირთა.

ვაქცინაციის შემდეგ ყველას საჩუქრები გადაეცა. იქვე დამონტაჟდა მობილური კაფე, სადაც აცრილებმა საწვიმარი, ჩანთები, 3 ჟეტონი (საჭმელი, დესერტი, სასმელი), Elite Electronics-ის მაღაზიიდან ფასდაკლების ვაუჩერი  მიიღეს. გარდა ამისა, პარკში იუსტიციის სახლის მოძრავი მანქანაც იყო, სადაც აცრილებს ერთჯერადი უფასო სერვისის მიღება შეეძლოთ.

ახალქალაქში ვაქცინაციის მსურველი ბევრი იყო. მთლიანობაში აცრა 120-მდე ადამიანს ჩაუტარდა. უცხო ქვეყნის მოქალაქეებსაც შეეძლოთ ვაქცინაცია. ახალქალაქში თბილისელმა ექიმებმა საქართველოში არსებული სამივე ვაქცინა ჩამოიტანეს: Sinopharm-ი, Sinovac-ი და Pfizer-ი. უმეტესი ნაწილი ახალქალაქელებისა Pfizer-ით აიცრა, მოთხოვნადობით მეორე ადგილას Sinopharm-ი აღმოჩნდა, ხოლო Sinovac-ით მხოლოდ 2 ადამიანი აიცრა.

ალისა სოკოროვა რუსეთის მოქალაქეა. აცრაზე თბილისში უნდა წასულიყო, მაგრამ ახალქალაქში ეს საშუალება გამოიყენა.

“აცრა მინდოდა, მაგრამ რადგან უცხო ქვეყნის მოქალაქე ვარ, მხოლოდ თბილისში შემეძლო. ამ ღონისძიებით ვისარგებლე და გაუსვლელად ავიცერი“, – განმარტავს ალისა სოკოროვა.

ღაზარიან კარინესაც სურდა აცრა, მაგრამ ვერ ბედავდა. გადაწყვიტა და 21 ნოემბერს აიცრა.

ღონისძიების გახსნაზე სიტყვით ახალქალაქის მერი მელქონ მაკარიანი გამოვიდა და ხალხს აცრებისკენ მოუწოდა.

დაავადებათა კონტროლის ეროვნული ცენტრის უფროსის მოადგილემ, პაატა იმნაძე ახალქალაქელებს მიესალმა და ყველას საკუთარი თავისა და ოჯახების დაცვისკენ მოუწოდა.

პარკში ბავშვებისთვის გასართობიც მოეწყო : თამაშობდნენ ბატუტზე, ჯიხურზე ხატავდნენ და მხიარულობდნენ.

სცენაზე ახალქალაქის აშუღური სკოლის მოსწავლეები, ანსამბლი “მურჯი”, ასევე ჯგუფი “ბენდი რეზო და ბავშვები” და გიორგი ხუციშვილი გამოვიდნენ.

ღონისძიებას ეკა ფანგანი და არამ ჯავაირჯიანი უძღვებოდნენ.  ეკა ფანგანმა მესამე, გამაძლიერებელი დოზა ახალქალაქის პარკში გაიკეთა.