„ბაზისბანკმა“ დაასრულა „ლიბერთი ბანკის“ აქციების 95,99%-ის შეძენის პროცესი და ამით საქართველოს საბანკო ბაზარზე ერთ-ერთი ყველაზე რეზონანსული გარიგება დახურა. ამის შესახებ ნათქვამია „ბაზისბანკის“ მიერ დღეს გავრცელებულ პრესრელიზში. „ლიბერთი ბანკის“ მომხმარებლებისთვის მინიმუმ 1 წლის განმავლობაში ყველა მომსახურება უცვლელი დარჩება.
მხარეებმა რეგულატორისგან თანხმობა ჯერ კიდევ 2025 წლის აგვისტოში მიიღეს, თუმცა მოლაპარაკებები აქტივის ღირებულების შეფასებასთან დაკავშირებული აზრთა სხვადასხვაობის გამო გაჭიანურდა. გარიგების დასრულების შემდეგ, „ბაზისბანკი“ ქვეყნის ერთ-ერთი უმსხვილესი საცალო ბანკის მაკონტროლებელი აქციონერი გახდა.
მნიშვნელოვანი ფაქტები:
ბაზრის წილი: „ლიბერთი ბანკი“ სიდიდით მესამე ბანკია საქართველოში („საქართველოს ბანკისა“ და TBC-ის შემდეგ).
მასშტაბი: ბანკი 1,7 მილიონ კლიენტს ემსახურება, მათ შორის პენსიონერებსა და სოციალური დახმარების მიმღებ პირებს. მას ქვეყანაში ყველაზე ფართო რეგიონული ქსელი აქვს.
მიმდინარე რეჟიმი: ამ ეტაპზე „ლიბერთი“ და „ბაზისბანკი“ მუშაობას დამოუკიდებლად განაგრძობენ. მომხმარებლები სერვისებს ძველებურ რეჟიმში, პროდუქტების ცვლილების გარეშე მიიღებენ.
მართვა: გარდამავალ პერიოდში ორივე ბანკს „ბაზისბანკის“ გენერალური დირექტორი, დავით წაავა უხელმძღვანელებს. მისი მთავარი ამოცანა მართვის სისტემების სინქრონიზაციაა.
დავით წაავამ ამ გარიგებას „უნიკალური შესაძლებლობა“ უწოდა, რომელიც გააერთიანებს ტექნოლოგიურ და ადამიანურ რესურსებს, რათა შეიქმნას უნივერსალური ფინანსური პლატფორმა როგორც კორპორაციულ, ისე საცალო სეგმენტში.
„ლიბერთის“ ხელმძღვანელმა, ბექა გოგიჩაიშვილმა ხაზგასმით აღნიშნა, რომ ბანკმა ტრანსფორმაციისა და ზრდის ეტაპი გაიარა, ახალი სტრუქტურა კი დამატებით შესაძლებლობებს გაუჩენს როგორც კლიენტებს, ისე გუნდს.
„ბაზისბანკი“ ჩინურ ჯგუფ „ჰუალინგს“ (Hualing) ეკუთვნის. ბანკმა ქართულ ბაზარზე პოზიციები 2022 წელს გაიმყარა, მას შემდეგ, რაც რუსული „ვითიბი ბანკის“ ადგილობრივი შვილობილის აქტივები შეიძინა (ეს უკანასკნელი უკრაინაში ომის გამო საერთაშორისო სანქციებში მოჰყვა). 4,9 მილიარდი ლარის აქტივებითა და 3,3 მილიარდი ლარის საკრედიტო პორტფელით, 2025 წელს „ბაზისბანკი“ ქვეყანაში მეოთხე ადგილს იკავებდა.
რაც შეეხება „ლიბერთი ბანკს“, მისი აქტივები დაახლოებით 5,8 მილიარდ ლარს შეადგენს, ხოლო საკრედიტო პორტფელი — 4,2 მილიარდ ლარს აღემატება. გარიგებამდე საკონტროლო პაკეტს ნიდერლანდური ჯგუფი ფლობდა, რომელიც მმართველ პარტიასთან, „ქართულ ოცნებასთან“ დაახლოებულ ბიზნესმენ ირაკლი რუხაძეს უკავშირდებოდა. რუხაძეს გაყიდვის მიზეზები არ დაუკონკრეტებია, თუმცა მედია ამ პროცესს დასავლეთის ქვეყნების მხრიდან მის წინააღმდეგ პერსონალური სანქციების დაწესების რისკებს უკავშირებდა. თებერვალში რუხაძემ ტელეკომპანია „იმედიც“ გაყიდა, რომელიც ხელისუფლების მთავარ „რუპორად“ მიიჩნევა; ამ ფაქტიდან მალევე ტელეკომპანია დიდი ბრიტანეთის სასანქციო სიაში მოხვდა.
Jnews-მა ინფორმაცია მომხმარებელთა მომსახურების შესახებ „ლიბერტი ბანკის“ ახალქალაქის ფილიალის წარმომადგენლებთანაც დააზუსტა. მათ დაადასტურეს, რომ ოფიციალური მონაცემებით, ორივე ბანკი მუშაობას ჩვეულ რეჟიმში განაგრძობს და უახლოესი ერთი წლის განმავლობაში ცვლილებები მოსალოდნელი არ არის. „ლიბერთი ბანკი“ საქმიანობას იგივე სახელწოდებითა და ლოგოთი გააგრძელებს და კლიენტებს არსებული პირობებით მოემსახურება.
